Med gjetarhund til nytte og glede
Han fekk sin første gjetarhund på byrjinga av 1960-talet og har seinare nytta gjetarhund både til arbeid på garden og som deltakar i konkurransar. Fortsatt er Jakob Gjerde (81) aktiv i gjetarhundmiljøet og tek gjerne på seg oppgåva som dommar når det trengst.
Heile sitt vaksne liv har Jakob Gjerde hatt sin eigen gjetarhund i arbeid på garden heime i Etne. Han har reist land og strand som deltakar på ulike konkurransar, og han har hatt jobben som dommar i alt frå lokale konkurransar til norgesmeisterskap. I dag stiller han ikkje lenger til tevling, men dommarkappa hiv han fortsatt på seg når det trengst.
Med ein sprek og livsglad border collie i hundegarden heime på Gjerde held han hundeinteressa ved like, og om vinteren stiller han og hunden på trening saman med andre lokale bønder. I sommarhalvåret er det sauesanking og konkurransar som gjeld, og sjølv om han ikkje lenger deltek i konkurransen likar han å følgja med frå sidelinja.
— Det er kjekt å sjå, og eg har fått masse gode vener som eg får treffa igjen, seier Gjerde som i dag set kursen til Alvdal i Hedmark for å få med seg NM i gjetarhund.
