Massiv motstand mot kraftlinjer

Målet med aksjonen er få utsetja høyringsfristen og få kommunen til å stilla seg negativt til prosjektet. Saka skal opp i kommunestyret torsdag ettermiddag.

I 2017 blei det vedtatt at den nye 420 kV kraftleidninga skal byggjast, men ønsket om å få lagt leidningsnettet utanom kommunegrensene i Etne kommune blei ikkje høyrt. Etter at formannskapet sist veke godkjente forslaget, mot visse endringar, er stadig fleire uroa for konsekvensane av at store stålmaster og milevis med kraftleidning skal skada fjellheimen.

Naturentusiastane Grethe Tesdal og Elen M. Hetleflåt Ramsvik er blant mange som stiller seg negative til den nye kraftleidninga i luft og meiner kommunestyret må stemma mot master gjennom kommunen. Dei ynskjer ny utgreiing og ei utsetjing av høyringsfristen som er sett til 14.desember. Som eit alternativ til dagens forslag meiner dei at heile eller deler av leidningsnettet kan skjulast ved å grava det ned i jorda eller ved å leggja kabel i sjø. Eit anna alternativ kan vera å la leidningsnettet svinga utanom kommunen.