Markerer 25 år som kunstnar

Den ferske 50-åringen har etterkvart markert seg som ein anerkjend norsk kunstnar i både inn- og utland, og kunsten hans er å finna på mange prominente stader. Mellom anna på statsministeren sitt kontor. I år feirar han 25 år som profesjonell kunstnar og dette blir markert med ei rekke arrangement og utgjevingar som understrekar hans betydelege bidrag til kunstverda.

Jubileumsutstilling

Den 25. april opnar Rafdal ei retrospektiv utstilling ved Dahl Rammeservice, staden der han først etablerte seg som kunstnar for 25 år sidan. Utstillinga har fått namnet Jan T. Rafdal – Retroperspektiv utstilling» og vil visa eit breitt spekter av hans arbeid, inkludert tidlege grafiske verk som lenge har vore oppbevart i arkivet hans. Desse verka, som inkluderer arkiv- og prøvetrykk samt nokre få ledige trykk frå tidlegare opplag, vil bli gjort tilgjengelege for publikum for første gong. Etter at trykkprosessen var fullført, blei dei originale platene destruerte, noko som gjer dette til ein unik moglegheit for samlarar og beundrarar av kunsten hans. Det er også laga nye jubileumsversjonar av to populære motiv.

Gir ut musikk

I tillegg til si kunstnarlege verksemd, er Rafdal også aktiv i musikkverda gjennom sitt prosjekt Owls to Athens som Grannar har skrive om før. Den 26. april bli ein ny låt frå dette prosjektet sleppt, og har fått namnet Minstrel’s Demise, på ABC Tunes. Låten, som er innspelt med musikarane Vegard Fossum, Rudolf Fredly, Lars Eirik Støle, og Torbjørn Økland, med Kjetil Ulland som produsent og Hogne Heggebø på fele, er ein folk-pop song som utforskar tema om overtru og samfunnsmessige utfordringar.

Rafdal har også konkrete planar om andre utgjevingar, og for dei som har lese boka Kattenes Kriminalprotokoll og vore begeistra over den, kan gle seg over at oppfølgjaren til boka blir lansert til hausten. Denne nye boka, som også vil bli utgjeven av Kapabel forlag, vil halda fram med å utforska det fiktive universet der intelligente kattar spelar ei sentral rolle i eit historisk samfunn.

Kunstnarleg bakgrunn og teknikkar

Rafdal, fullførte utdanninga si i 1999, og har studert illustrasjon i England og ved Garnes VGS i Arna. Han har ein variert kunstnarleg praksis som spenner over grafikk, teikning og måleri. Hans arbeid har ofte utforska landskap og natur, og i dei seinare åra har han også vendt blikket mot dei lokale fjella i Etne som motiv. Dette har resultert i ein serie landskapsmotiv som viser ein sterk tilknyting og ei djupare utforsking av det lokale landskapet. Rafdal si evne til å krysse kunstnarlege grenser og utforska nye uttrykksformer gjer han til ein markant figur i norsk kunst- og kulturliv. Hans jubileumsår er ei feiring av ein omfattande og innverknadsrik karriere.