Emelie Gjerde har budd i sin eigenfinansierte leilegheit sidan 1. september. Å eiga sin eigen bustad så tidleg som mogleg, har vore ein draum og eit mål Emelie har hatt sidan ho var svært ung.
Foto: Grethe Hopland Ravn
Bygg og bu
Målretta sparing gjorde draumen verkeleg
Emelie Gjerde har drøymt om å eiga sin eigen bustad heilt sidan ho var lita, og gjennom målretta sparing har ho klart å realisera draumen i ein alder av 24 år.
Den unge 24-åringen frå Sandeid har alltid vore bevisst på viktigheita av å spara pengar. Draumen om eigen bustad har vore ein konstant motivasjon gjennom oppveksten, og ho begynte å spara målretta allereie som tenåring. Emelie Gjerde var klar over at eigenkapital til bustadkjøp ikkje kom av seg sjølv, og derfor har ho vore bevisst på å setja av pengar jamleg.
Ho har også fått god hjelp frå rådgjevar Siri Tungesvik Vestbø i Haugesund Sparebank, og har no kjøpt sin første bustad i dei nye rekkehusa på Balahaugen i Sandeid. Målet har ho nådd gjennom målretta sparing i mange år.
— Eg starta som 13-åring med å jobba som avløysar, og å servera på ulike arrangement på samfunnshuset. Eg hadde også fleire jobbar, men fekk etter kvart lærlingplass som barne- og ungdomsarbeidar, og vidare arbeidserfaring innan økonomi og administrasjon. All inntekt frå desse jobbane har blitt fordelt på BSU (bustadsparing for ungdom) og sparekonto, seier ho.
