Fylkesvegen mellom Skjold og Vikebygd er blant strekkjene som får ny vegentreprenør etter at Statens vegvesen har mista ansvaret.
Arkivfoto: Jon Edvardsen
Lyser ut sine to første kontraktar for vegdrift
Fylkeskommunen lyser ut to kontraktar for drift og vedlikehald av fylkesvegar i Vindafjord og sju andre kommunar i Rogaland. Dei overtar ansvaret etter Statens vegvesen.
— Dette er dei to første kontraktane som gjeld drift og vedlikehald av berre fylkesvegar, opplyser Ann Mari Sandvin Hardeland og Eivind Stangeland i ei pressemelding.
Dei to er seksjonsleiarar på drift og vedlikehald i Rogaland fylkeskommune og har ansvar for kvar sin kontrakt.
Før regionsreforma hadde Statens vegvesen ansvar for riks- og fylkesvegar. Nå er det fylkeskommunen som har ansvaret for å drifta og vedlikehalda fylkesvegane i Rogaland. Inn under dette ligg oppgåver og rutinar som er nødvendige for at vegane skal fungera godt for trafikantane og dagleg bruk, for eksempel strøing/salting og brøyting.
