Løyver 250.000 til tennisbanar
Etne IL fekk ja på sin søknad om 250.000 kroner til rehabilitering av tennisbanar i Etne. Kommunedirektøren sitt forslag til inndekning vil gi eit underskot i rekneskapen, noko fleirtalet i kommunestyret ikkje ville vera med på.
Dei to tennisbanane i Etne blei bygde i 1993 og har eit stort behov for rehabilitering ifølgje søknaden frå Etne Idrettslag. Dei har no konkrete planar om å totalrenovera tennisanlegget, og prislappen på operasjonen er kalkulert til 1,3 millionar kroner. 250.000 kroner av denne summen håpar idrettslaget vil komma frå Etne kommune.
Tennisgruppa opplever for tida ei auke i interesse for idretten frå folk i alle aldrar. Levetida på eit tennisanlegg er 25 år, og i Etne er tennisbanane snart 30 år gamle. Ifølgje kommunedirektøren ser Etne kommune positivt på tiltak som gir eit rikare fritidstilbod, og kommunen har eit ønskje om å imøtekomma søknaden med 250.000 kroner.
Annonse
Kommunedirektøren vil henta desse pengane frå drift av kultureininga i 2022, men det vil medføra eit underskot i rekneskapen. Dette forslaget var det berre Kristin Golf (V) og Lars Olav Bergsvåg (H) som støtta. Resten av kommunestyret støtta forslaget frå Senterpartiet og Arbeidarpartiet om at 250.000 kroner blir gitt til rehabilitering, men at inndekninga først vil avgjerast i samband med handsaminga av 2. tertialrapport.
