Lover breitt program: – Me har noko for alle

Marknadssjef Vidar Lund lovar eit breitt program, med mykje spennande opplegg for dei besøkande.

– Det vil bli eit stort utval av aktivitetar og andre opplevingar på marknaden, og eg trur me har noko for alle og ein kvar, seier han.

I dei litt over 130 bodene på plassen kan ein sjå eit vidt spekter av handlaga gjenstandar, i tillegg til veteranbilar, landbruksmaskinar og mykje meir.

Satsing på unge

I år som i fjor satsar marknaden stort på den unge generasjonen med marknadsbesøkande. Med vassaktivitetar, bilbane, dyreutstilling og fleire konkurransar som ungane får ta del i, håpar Lund at det blir ein dag fylt med positive inntrykk.

– Vi er opptatt av barn og unge, og vil prøva å toppa tilbodet, seier han.

Både Paw Patrol og Bjørnis kjem tilbake til Etne for å underhalda dei små. Det vil også bli mange nye aktivitetar på området utanfor Skakkesenteret.

Den ferske Skakkeringen kjem til å bli tatt i bruk under marknaden. Der er det diverse leikeapparat som ungane kan svinga seg i, i tillegg til at det kjem til å vere ein scene og fleire små aktivitetar.

Med nye underhaldarar som sjonglørane Benjamin og Mathias, og TV-profilane Samen og Søringen, vil ungane få ta del i blant anna sirkusskule og lassokasting.

– Eit anna nytt tilbod er strikkhopputskyting. Det trur eg blir kult, seier Lund.

Matopplevingar

På matfronten har det også blitt gjort nokre endringar i år. I staden for at det er frivillige som står og grillar på plassen, har det blitt leigd inn profesjonelle folk som skal bistå med grillstasjon og eit telt med steinomns-pizza.

– På denne måten slepp vi å finna frivillige til denne stasjonen. Det er ein stressande jobb, og det er ikkje alltid så enkelt å finne frivillige, så vi tenkte at på denne måten slepp vi det, i tillegg til at kvaliteten og utvalet blir litt høgare.

Fordi Skakkeringen har kome der matområdet pleier å vere, kan ein under årets marknad ta lunsj- eller middagspausen på parkeringsplassen ved sida av kunstgrasbanen. Der vil ein finna denne proffe grillstasjonen og mange andre ulike matboder.

– Det vil vera alt frå tradisjonsmat til indisk å finna på området, så me håpar det fell i smak, seier han.

— Tradisjonen tru blir det Etnir Duggurd i år også. Det populære matkonseptet har i år fått ny prosjektleiar, med Bernt Enge bak rattet. Med kokken Erlend Sueland på plass, vil det bli ei god matoppleving, seier marknadssjefen.

Fleire kveldsarrangement

På fredag kveld er det The Voice-vinnar Inger Lise Hope som skal synga i gang marknaden. Ho har vore booka sidan den første auditionen hennar i programmet, ettersom dei marknadsansvarlege hadde stor tru frå første gong dei høyrde songstemmen til stavangerbuen.

– Heile gjengen følgde med på The Voice, og vart veldig imponerte av Hope med ein gong, så me enda med å booka ho. Nokre månadar seinare viste det seg at ho gjekk heilt til topps, seier festivalsjefen.

I tillegg til konserten hennar skal det vera kveldsarrangement på Saloonen både fredag og laurdag. Lund viser til den tradisjonelle marknadsdansen som eit utruleg populært arrangement.

– Det var smekkfullt i fjor, med nesten 800 personar til stades, så me satsar på same trøkk i år, seier han.

Vanskeleg å finna frivillige

Lund og resten av marknadsstyret driv i desse dagane arbeid med logistikk og organisering, for å få på plass alt som trengs i forkant av det store arrangementet. Ein av dei største utfordringane viser seg å vera å finne dugnadsfolk.

– Det er ein kamp å finna frivillige, og den desidert vanskelegaste oppgåva. Me byrjar å nærma oss noko no, men me treng framleis fleire frivillige, seier han.

Det er rundt 450 menneske som skal til for å å organisera eit arrangement som dette, fortel marknadssjefen, og legg til at dei er avhengige av frivillig innsats.

– Dugnadsånda er ikkje heilt slik som den var for tjue år sidan. I tillegg er det mange andre arrangement i Etne som også krev frivillige, så det seier seg sjølv at dette er ei krevjande oppgåve, fortel festivalsjefen.

Sjølv om dei ikkje er heilt i mål med alt, er det ein engasjert og positiv marknadssjef som snakkar med Grannar. Han gler seg til den store helga, og håpar særleg på ein ting:

– Eg håpar folk går ut av festivalen med ein god følelse og lysten til å koma tilbake igjen neste år. Det er målet.