Leverer handlaga turbinar over heile landet
Heime i Kvaløy har Martin Richard Vanvik (80) i mange år produsert vassturbinar til små kraftverk. I dag er hans heimelaga peltonturbinar å finna i minikraftverk over heile landet og framleis har han eit par ordrar på oppdragslista.
I verkstaden på Kvaløy står eit av Martin Richard Vanvik sitt siste prosjekt. Ein peltonturbin som snart skal omdanna rennande vatn til rein energi. For den oppfinnsame turbinbyggjaren er dette eit av hans siste prosjekt så langt, og føyer seg inn i ei lang rekkje turbinar han har laga for eiga hand.
— Eg har laga rundt 150 peltonturbinar, seier Martin Richard Vanvik som for alvor tok fatt på turbinbygginga då han gjekk av med pensjon.
Talet på turbinar han produserer i året varierer, men han har ennå ikkje opplevd å ha ei tom oppdragsliste. Topp kvalitet på arbeid og materialval har gjort turbinmakaran frå Kvaløy til ein ettertrakta leverandør, og folk frå heile landet tek kontakt for å sikra seg eit handlaga kvalitetsprodukt med særs lang levetid.
