Legg ned kafé

— Det går rett og slett på at det ikkje er nok omsetnad. Enkelt og greitt, seier Terje Kleiven i Isvik Helse, som eig bygget og kafeen.

Måndag 27. oktober er siste opningsdag for kafeen som ligg i sentrum av Isvik i Skjold.

Utnytta ikkje potensialet

Det var i desember 2023 at Isvik Café opna dørene. Tidlegare heldt Frøken Fryd Kafé & Interiør til i lokala. Kleiven fortel at avgjerda om å leggje ned blei teken for fleire månader sidan, sjølv om sommaren var bra. På årsbasis var ikkje drifta berekraftig.

— Me har drive i to år og gjort eit ærleg forsøk. Skal me drive igjen, blir det med eit anna konsept, fortel byggeigaren.

Responsen frå lokalsamfunnet har vore avgrensa. Nokre faste gjester fann vegen, men kafeen vart ikkje den møteplassen ein hadde håpa på, trass kort avstand og god synlegheit frå E134. Kleiven meiner at området har potensial dersom dei finn rett konsept.

— Det er lite serveringsplassar her, så eigentleg skulle det vere moglegheiter, seier han.

Ny aktivitet

Sjølv om det blir stille ei stund, kjem det truleg noko nytt i lokala om ikkje altfor lenge. Byggeigaren opplyser at dei vil leggje nye planar for bruken på nyåret.

— Det kan òg bli aktuelt med anna aktivitet. Me har to–tre ballar i lufta. På sikt blir det i alle fall noko, fortel Kleiven.

Forutan i Isvik driv han med sal av mat frå Caprae Gardsrestaurant heime på garden ved sjøkanten i Langelandsvik i Skjold. Han understrekar at nedlegginga i Isvik ikkje påverkar drifta der, og viser til at det er to ulike firma.

— Me hadde suksess på gardsrestauranten i sommar, og pop up-restaurantane òg, avsluttar Kleiven.