Lanserer foreldrekurs

— Har du kjent på kjensla av å ikkje strekka til? Minstebarnet gret, og du forstår ikkje kvifor. Treåringen vrir seg misnøgd på golvet, og du lurer på om du skal gi nærleik, gi etter eller setja grenser. Du er ikkje åleine om å vera usikker, skriv Etne kommune på nettsida si.

For alle

Kommunen ønskjer å leggje til rette for at folk skal kjenna seg trygge. Dei tilbyr foreldrekurs i programmet Circle of Security-Parenting (COS-P), Tryggheitsirkelen. Kurshaldarane er godkjende COS-P-rettleiarar.

Målgruppa for kurset er foreldre busette i Etne kommune, med barn mellom seks månadar og seks år. Circle of Security-Parenting er eit foreldrerettleiingsprogram som byggjer på 50 år med forsking innan tilknytingsteori.

— Kurset passar for alle, skriv kommunen.

Merksemd

Føremålet med kurset er å gjera foreldre meir merksame på å sjå, tolka og møta barnet sine behov, og at ein blir bevisst på eigne haldningar, kjensler og handlingar i samspelet med barnet. Barn kan ikkje vera med.

Det blir parallelle kurs i Skånevik og Etne. Oppstart er i Skånevik tysdag 9. september og i Etne måndag 1. september. Det er sett av sju ettermiddagar kvar stad, ein i veka med pause i haustferien.

I Etne vil Evelyn Tvedt Øverland og Mari Ann Mannes Landa vera kurshaldarar på Etne helsestasjon. Hege Hansen og Laila Sævareid vil ha kursa i Skånevik barnehage. Påmelding eller spørsmål til kurset i Skånevik kan sendast til Hansen, medan ein i Etne kan kontakte Tvedt Øverland.