Langt mellom kundane

Det har gått ti og eit halvt år sidan ho tok over Fjordkroa i Skånevik, og dei siste seks åra har ho også drive fiskebutikk. Men no er det nok, for kundane sviktar.

— Eg har jobba på dugnad sidan eg starta opp, og med unntak av eit par gonger etter bluesfestivalen, har eg aldri tatt ut løn, seier Liv Anne Moe som no går inn i sine siste veker som butikkeigar og pubvertinne.

Sjølv om det ligg side på side med fersk fisk i disken, ser det ikkje ut til å freista kundane i det heile. Liv Anne Moe forstår seg ikkje heilt på det, for med jamne mellomrom står det fiskebil på kaien for å selja fisk og då står folk i kø.