Lagar personleg gåvepapir
Har du lyst til å setja ein ekstra spiss på årets julegåveinnpakning kan ein tur innom Fotofjosen på Bjoa vera løysinga. Her kan du få skreddarsydd julepapir av eigne bilde.
— Dette er heilt nytt. Me har julepapir som er skreddersydd til den enkelte kunde. Me kan ta bildene for kunden, eller lage julepapir med bilder dei har tatt sjølv. Me printar på både kvitt papir og gråpapir, seier Trond Ponce i Fotofjosen på Bjoa.
Håpar på suksess
Annonse
Gåvepapir er kjøpt inn og den største printeren er klargjort for oppdrag. Om forretningsideen med skreddarsydd julepapir blir ein suksess vil tida vise.
— Me får sjå om det slår an. Eg tenkte det kunne vera løye å prøva. Eg sel papir i 80cmx2 meter, seier han.
Ein del julepapir med bilde av kyrkja på Bjoa er alt produsert og nå står motiv frå Vikebygd for tur.
— Eg gjer meg klar til julemesse på Bjoa og i Vikebygd, forklarar han.
Annonse
Ulike oppdrag
Trond starta Fotofjosan saman med kona Linn heime på Bjoa i 2022. På oppdragslista står det meste av fotografering enten kundane vil ha eit minne frå ein privat merkedag, eit dronefoto av eigedomen, eit portrett eller eit bildeminne av kjæledyret.
— Me tek det meste av oppdrag. Eg køyrer ein del ut til kundane, men nokre kjem også her, særleg med hundane sine. Hundebilde er blitt populært, seier han.
Når det stundar mot jul er det ikkje berre personleg julepapir som kan vera kjekt å ha. Julebilde er ein tradisjon som har lange røter her til lands, og før facebook og andre sosiale medium gjorde sitt inntog var det mange som sende julebilde i posten til slekt og vener. I fjor ville Pence teste ut konseptet med julebilde og rigga seg til for fotografering.
— Me lagde til for julebilde i fjor, og me tek framleis julebilde om nokon ber om det. Me lagar også til og frå lappar, seier han.
