Kyssing er mange millionar år eldre enn menneskeslekta

Det første kysset var ikkje mellom to forelska menneske, men mellom dei genetiske forfedrane våre for rundt 20 millionar år sidan, ifølgje ein ny studie.

Forskarar frå universitetet i Oxford og Florida Institute of Technology ønskte å finne ut når kyssinga tok til, med tanke på at det i eit evolusjonsperspektiv ikkje har nokon openberr fordel med tanke på overleving, men derimot kan bidra til å spreie sjukdom.

Likevel kyssar vi altså, både vi menneske og sjimpansar, gorillaer, orangutangar og dvergsjimpansar. Det antydar veldig sterkt at dette var noko vi har arva frå dei felles forfedrane våre.

Simulerte millionar av scenario

I studien som vart publisert i tidsskriftet Evolution and Human Behavior onsdag, har forskarane kombinert observasjonar av primatars åtferd og data om evolusjonære forhold, med mål om å skru tida tilbake og finne ut når det første kysset skjedde.

– Med desse to avgjerande faktorane brukte vi ei modelltilnærming for å simulere ulike scenario i utviklinga, seier hovudforfattar Matilda Brindle frå Oxfords biologiske fakultet.

Ved å køyre fleire millionar simuleringar kom dei fram til at vi – eller det som langt om lenge skulle bli vi» – klinte til for første gong for 16,9-21,5 millionar år sidan.

Og medan vi andre kanskje har eit romantisk syn på kva eit kyss eigentleg er, held forskarane seg til ein definisjon der kjensler blir haldne utanom: ikkje-aggressiv munn-til-munn-kontakt som ikkje involverer overføring av mat». Det inkluderer seksuelle kyss og platoniske kyss som dei mellom familiemedlemmer eller når vi helsar på venner.

Veit ikkje kvifor

Kvifor kyssing oppstod, og kvifor vi framleis driv med det, er framleis gjenstand for debatt.

– Nokre menneske antydar at seksuell kyssing er ein nyttig å måte å vurdere kvalitetane og kompatibilitet hos ein partnar. Eller så kan kyssing vere eit slags forspel som aukar den seksuelle tenninga og betrar moglegheita for unnfanging, seier Brindle.

Ho seier at det er grunn til å tru at platoniske kyss blir brukt til å navigere komplekse sosiale forhold og skape sterkare band.

Forfattarane bak studien hevdar også at dei menneskelege forfedrane våre kyssa neandertalar, ettersom det er bevist at dei fekk barn saman og at dei hadde ein mikrobe i munnen til felles – eit teikn på at dei utveksla spytt – lenge etter at dei to artane gjekk i ulike retningar for 450.000-750.000 år sidan.

(NPK)