Kvinnene i babybyte-saka på Sunnmøre ankar til Høgsterett

Karen Rafteseth Dokken, som fekk med seg feil baby heim frå fødestova, ankar saka til Høgsterett. I lagmannsretten tapte ho søksmålet mot staten.

Ifølgje NRK ankar også dottera som voks opp hos Dokken, saka. Dottera blir no representert av advokat John Christian Elden.

– Det er viktig å få Høgsteretts syn på ei så spesiell sak der retten til familieliv klart er krenkt, seier advokaten.

Til NRK seier Dokkens advokat, Sølvi Nyvoll Tangen, at klienten meiner resultatet i lagmannsretten er feil.

Konklusjonen i lagmannsretten var den same som i tingretten, der to av dei tre involverte kvinnene anka avgjerda.

Lagmannsretten finner ikke grunnlag for at staten som overordnet myndighet har brutt EMK artikkel 8 ved manglende eller utilstrekkelig innretning av fødselshjelp eller barselomsorg», står det i dommen.

Dei to babyane vart for 60 år sidan forveksla på fødestova på Eggesbønes i Herøy og voks opp hos kvarandre sine biologiske foreldre utan at nokon visste om feilen. Den aktuelle fødestova var privat driven, og verken kommune eller stat var involvert i drifta.

Mor til den eine kvinna oppdaga allereie i 1981 at kvinna ikkje kunne vere den biologiske dottera hennar. Helsedirektoratet fann i 1985 ut at det hadde skjedd ei forveksling, men fortalde ikkje dette til dei involverte.

Forvekslinga kom for alvor fram i lyset i 2021 etter at ei av kvinnene fekk eit uventa treff på nettstaden My Heritage.

(NPK)