Kongebesøket
Kongen avviser ikkje Etne-besøk: — Du veit aldri
Etter besøk i Vindafjord står berre 11 kommunar igjen før kong Harald har vore på besøk i alle kommunane i Noreg. På spørsmål om det er planar om å besøke nabokommunen Etne er kongen ikkje avvisande.
— Me kan ikkje seie at me er der i morgon, men du veit aldri, seier kong Harald til Grannar.
Han og dronning Sonja var i godt humør under det avsluttande pressemøtet før han gjekk om bord i Kongeskipet Norge og reiste frå Ølen.
Annonse
Dei spøkte med fylkesgrensa som eit hinder og om reporteren er frå Etne, noko dei hadde rett i.
Sidan søndag har kong Harald og dronning Sonja vore på fylkestur i Agder og Rogaland, der fem kommunar fekk sitt aller første offisielle kongebesøk.
Manglar 11
Dermed har kong Harald no nesten besøkt alle kommunar i Noreg – med unntak av elleve. Det var kongens første fylkestur etter at han vart sjuk i Malaysia i vinter og måtte opererast.
– Korleis har helsa fungert?
– Helsa? Nei, den har eg ikkje tenkt på, så det må eg kjenne etter. Nei, det har gått veldig fint, svarte kongen NTB då dei møtte pressa i samband med avslutninga av turen.
Får energi av folk
Kongen og dronninga sa vidare at det gir dei energi å møte så mange folk ute på tur. Og då NRK spurde kongen om det ikkje blir noko av nedtrappinga, som Kongehuset varsla tidlegare i vår, svarte kongen lattermildt:
– Ikkje i dag.
