Varaordfører Kenneth Karlsen (Frp) har bedt om eit møte med olje- og energiminister Terje Aasland (Ap) om den betente saka kring nytt straumnett på Haugalandet.ARKIVFOTO
Kraftlinja
Kommunen ber om hastemøte med olje- og energiministeren
Varaordførar Kenneth Karlsen (Frp) i Etne meiner det framleis må vere mogeleg å få til ei løysing med jord- og sjøkabel framfor såkalla monstermaster gjennom naturen i Etne og Vindafjord. På vegner av kommunen har han no bedt om eit snarleg møte med olje- og energiministeren.
Statnett ønskjer som kjent flere mil med nye 450 kV kraftlinjer i luftspenn frå Blåfalli i Kvinnherad, via fjell og åsar i Etne og Vindafjord, til Haugaland Næringspark i Gismarvik i Tysvær. Planane har møtt motstand, spesielt blant mange innbyggjarar i Etne. Dette har mellom anna kome fram gjennom ei rekke debattinnlegg i Grannar dei siste vekene, og i Etne er det både privatpersonar og politikarar som jobbar for å få myndigheitene til å tvinge Statnett til å heller velje ei løysing med jord- og sjøkabel. Noko som har blitt avvist av Statnett, fordi dei meiner det blir for dyrt.
Fleire frontar
Men dei som kjempar mot dei såkalla monstermastene får også motstand. Fleire av Høgre sine ordførarkandidatar på Haugalandet, mellom dei Modolf Haraldseid i Vindafjord, har tatt til orde for at Statnett må få sin konsesjon så raskt som mogeleg. Dei har stortingsrepresentant Sveinung Stensland (H) frå Haugesund med på laget, og Ii et lesarbrev siste veke gav dei nemnde Høgre-politikarane uttrykk for sin frykt for at mogelegheiter for næringsutvikling i regionen forsvinn viss saka dreg ut i tid. Stensland har også stilt eit skriftleg spørsmål til olje- og energiminister Terje Aasland (Ap), kor han etterlyser fortgang i saka.
