Kommune kuttar gratis kaffi – vil spare 1,3 millionar kroner

Fleire kommunar slit med økonomien og planlegg kutt. I Færder kommune risikerer dei tilsette å miste gratis kaffi på jobb.

– Vi må ruste oss for ein ny røyndom, sa kommunedirektør Kristin J. Kirsebom då ho la fram budsjettforslaget sitt, ifølgje Tønsbergs Blad.

Kommunen slit til liks med mange andre kommunar med krevjande økonomi og skal spare 90,8 millionar kroner neste år. Derfor foreslår kommunedirektøren å krevje inn pengar frå dei tilsette for kaffi på jobb.

50 kroner i månaden

Ifølgje avisa blir prisen på 50 kroner per månad på kaffi. Tilsette med 50 prosent eller mindre stilling slepp unna med 25 kroner i månaden.

Det blir også mogleg å sleppe unna betalinga om ein ikkje drikk kaffi.

Totalt reknar kommunen med å dra inn 1,3 millionar kroner på ordninga. Som utgangspunkt har dei sett på kaffiutgiftene på ei kontoravdeling og to kommunale bustader.

– I gjennomsnitt bruker dei 730 kroner per tilsett på kaffi og te, seier kommunikasjonssjef Helen Kristina Wedberg.

Kutt fleire stader

Fleire kommunar slit med trong økonomi og planlegg i desse dagar kutt i tilbodet for neste år. Kommuneorganisasjonen KS meiner situasjonen er svært alvorleg og håpar på auka overføringar til kommunane i forhandlingane om statsbudsjettet.

– Eg får dagleg tilbakemeldingar frå folkevalde som blir tvinga til å kutte i viktige tenester. Dette skjer i stort omfang, har KS-leiar Gunn Marit Helgesen sagt til NTB tidlegare.

Finansminister Jens Stoltenberg (Ap) har sagt seg samd i at mange kommunar opplever ein krevjande økonomi.

– Situasjonen i kommunane kan ikkje løysast med pengar åleine. Befolkninga er i endring, med færre barn og stadig fleire eldre. Kommunesektoren står derfor overfor store omstillingar framover, og mange kommunar står allereie midt i denne omstillinga, har Stoltenberg tidlegare sagt.

(NPK)