Kommuneval 2023
Kø til urna i starten av valdagen
Det var kø på Ølen kulturhus då stemmegivinga opna klokka 12. Vidar Miljeteig var blant dei som var tidleg ute på valdagen måndag.
— Eg var i tvil til det siste, men trur eg har valt det riktige for Vindafjord, seier Vidar Miljeteig.
Annonse
Mormora hans Gerd Nymark nytta også høve til å stemme i lunsjtida.
Likar å bruke valdagen
Kort tid etter at vallokalet opna var det såpass mange i kø at ein del måtte vente utanfor salen før dei fekk komme inn og stemme. Blant desse var stortingsrepresentant Terje Halleland (Frp), som hadde tatt turen for å gjere si borgarplikt på heimebane.
— Det er alltid greitt å stemme på valdagen så lenge eg har sjansen, seier Halleland.
Annonse
Han håpar partiet kan få tre representantar inn i kommunestyret. Stortingsrepresentanten understrekar at det er viktig for lokallaget å få til eit politisk skifte i Vindafjord, og at dei vil støtte Høgre sin ordførarkandidat Modolf Haraldseid.
I Ølen var det eit jamt sig med folk etter opninga av vallokalet, og det tok over ein halvtime før det blei litt rolegare frekvens av folk med valurna. Forutan kommunestyre- og fylkestingsval, er måndag også dagen for kyrkjevalet. Rett innanfor døra til kulturhuset sat Signe Britt Vik og Magnhild Handeland Helberg tok imot stemmer til det valet.
— Det har vore ein del folk innom, fortel Vik og Handeland Helberg.
Meir om valdagen her:
Ennå tid
Det er totalt ni vallokal i Vindafjord, ei i kvar bygd. Desse er:
Annonse
- Ølen valkrins – Ølen kulturhus
- Sandeid valkrins – Sandeid samfunnshus
- Vikedal valkrins – Vikedal bygdahus
- Imsland valkrins – Imsland bygdahus
- Vats valkrins – Arken, Vats bedehus/soknehus
- Skjold valkrins – Skjold Arena
- Vikebygd valkrins – Vikebygd bygdahus
- Bjoa valkrins – Bjoa skule
- Vågen valkrins – Vågen bygdasenter
Alle vallokala har opent til klokka 20 på kvelden. Ein del veljarar har allereie brukt stemmeretten sin. Avdelingsleiar for kommunikasjon og service Hilde Hellenes og fagleiar for politisk sekretariat Anne Mette Klungland fortel av det er 1.192 godkjente forhandsstemmer i Vindafjord. Dette utgjer 17,59 prosent av alle med stemmerett.
Dei første valresultata blir offentleggjort klokka 21. Du kan følge valresultat og reaksjonar fortløpande på grannar.no.
