— Kjem til å kjennast kraftig på lommeboka

— Når desse bomstasjonane kjem, vil dei bli strategisk plasserte der det er flest daglege passeringar. Dette kjem til å kjennast kraftig på lommeboka til innbyggjarane i Vindafjord kommune, sa Mats Årvik (Frp) i eit kommunestyremøte tysdag 29. april.

Med 21 mot tre stemmer vedtok kommunestyret at Vindafjord skal vere prinsipielt positive til ei bompengeløysing for utbygging av E134 mellom Bakka og Solheim.

Stor byrde

Årvik var ei tydeleg motstemme i debatten. Han poengterte at E134 er ein ekstremt viktig veg, som er hovudfartsåra mellom aust og vest. Difor reagerer han på at kommunen vil ta ein ekstra del av rekninga for å bidra til ei statleg oppgåve som bygging av ein europaveg.

— Her vil kommunestyret leggje den største økonomiske byrda over på innbyggjarane i Vindafjord kommune, sa Frp-politikaren.

Han var tydeleg på at partiet kom til å stemme mot eit slikt forslag, og oppmoda andre til å gjere det same. Partiet hadde berre to av sine tre representantar på plass i kommunestyret.

Den einaste som følgde Årvik si oppmoding var Guri Ravatn (SV). Ho understreka at ho støtta alt som var sagt om trafikksikker veg og behovet for ein veg utanom sentrum, men slo fast at ho ikkje kan støtte at det er trafikkantane som skal betale store delar av prisen.

Trafikktryggleik

Sjølv om det var stort fleirtal for eit prinsippvedtak, var det liten entusiasme for bompengar i kommunestyret. Ivar Ødegård (Vindafjordlista) omtala det som ei vanskeleg sak, men støtta vedtaket for å få fortgang i prosjektet.

— Vår meining er at oppgradering og vedlikehald av europavegnettet heilt klart er ei statleg oppgåve, og at bilistar og næringsliv allereie betaler sin del av den kaka i dag, sa Ødegård.

Vidare poengterte han at Vindafjordlista òg ser at delvis bompengefinansiering av Bakka–Solheim vil kunne føre til ein stor ekstrakostnad for private og det lokale næringslivet, og at dette på ingen måte er ei gunstig løysing. Opplevinga av at Bakka–Solheim-prosjektet stadig blir nedprioritert frå sentralt hald, fekk partiet til å tenkje at om eit prinsippvedtak om bompengar kan vere med å få fortgang på prosjektet og ein snarlegare realisering, så er det så viktig at kommunen må sjå på den moglegheita.

For dei var hovudargumentet trafikktryggleik. Ødegård trekte fram sikkerheita for både dei som ferdast motorisert langs vegen og dei som bur langs dagens veg.

— Altfor ofte les me om ulukker på den aktuelle strekninga, og eg kan av erfaring meddele at det altfor ofte skjer ulukker som har alvorleg og tragisk utfall, sa Ødegård.

Vil ha vegen ut av sentrum

Bakka–Solheim har ifølgje varaordførar Gustav Løge Fosse (KrF) vore på dagsorden så lenge han har vore i lokalpolitikken. No håpar han at vegen kan bli realisert slik at han kanskje får nytte han i si tid.

— Det å få eit godt prosjekt som blir lagt utanom sentrumsområde der mjuke trafikantar skal vere dei me har mest av, og ikkje gjennomgangstrafikk og tungtrafikk, det er uhyre viktig, sa Løge Fosse.

Varaordføraren understreka at han heller ikkje er kjempebegeistra for at kommunen kanskje må bruke bompengar, men viss det kan vere med å framskunde bygginga, vil han likevel vere med på det. Han trur det vil vere uhyre viktig for Vindafjord å få heile vegstrekninga på plass.

— Trafikken vil auke, og då må me gjere alt me kan for å redusere trafikken gjennom tettstadane våre, avslutta varaordføraren.