Jublar for mobildekning
Tysdag tok kommunestyret i Vindafjord eit nytt steg mot realisering av E134-prosjektet Ølen–Fikse. Guri Ravatn (SV) gler seg over at det også blir fart på arbeidet med mobildekning på Fikse.
— No er bekymringa blitt møtt av Telenor. Det er bygd ei ny mobilmast som er klar til bruk, sa Guri Ravatn (SV).
Vidare sa ho at kommunalsjef for samfunnsutvikling, Halfdan Krohn Brekke, har fortalt at ein berre ventar på BKK, som skal gjere dei siste installasjonane før masta kan komme i drift.
Annonse
Manglande og ustabil mobildekning langs E134, særleg ved kommunegrensa på Fikse, er ei utfordring for folk som ferdast og bur i området.
Årelang kamp
Ravatn påpeika at dei som har følgt ho i politikken ei stund, veit at SV til stadigheit har kome tilbake til spørsmålet om mobildekning på Fikse. Ho tok opp saka i kommunestyret i oktober 2021 og har løfta den politisk fleire gonger sidan.
Vindafjord kommune har, ifølgje Ravatn, lova både Telenor, Utval for drift og utvikling (DUK) og henne at dei skal sende ei påminning til BKK om at installasjonsjobben står att og må bli gjort.
Annonse
— Dette er ei gladsak me kan krysse av, sa Ravatn.
Til saman 23 oppsitjarar på Fikse og Hiksdal var råka av manglande mobildekning då Grannar omtala saka i 2021. Blant desse er Anne-Margrethe Eidhammer.
Ho betaler for å få behalde fasttelefon, fordi ho kan vere trygg på dekning der – men ikkje på mobildekning i heile huset sitt. Ho har naboar som må springe til vindauget. Dette har vore situasjonen sidan ho fekk mobiltelefon i 2000.
— No er tolmodet mitt – og mange med meg – slutt, fortel Eidhammer.
Allereie i 2018 løfta ho saka, og ho har engasjert seg sterkt sidan. Utan mobildekning føler ho seg litt som i steinalderen. Ho framhevar mobildekninga si rolle i beredskapen og slår fast at kommunen må kontakte BKK snarast for å få fullført installasjonen som set den nye mobilmasta i drift.
Glad for tryggleik
Annonse
Bakgrunnen for debatten der Ravatn tok opp mobildekninga, var andre gongs handsaming av detaljreguleringa for E134 Ølen–Fikse. Denne blei samrøystes vedtatt.
— Dette vegprosjektet er eit prosjekt som set ny vegstandard utan at me byggjer ned store areal, samanlikna med å byggje heilt nye vegar, sa Monica Nesheim (Sp).
Det legg, ifølgje Nesheim, til rette for ei sårt tiltrengt oppgradering av ein trafikkfarleg strekning og er bra for alle som ferdast. Sp-politikaren fortalde at ho sjølv har opplevd å komme tett på ei ulykke på denne strekninga, nestenulykker, og har stått i kolonne over Fikse.
— Eg trur at dette blir veldig bra for heile regionen, sa Nesheim.
Åge Opheim (H) skulle gjerne ønskje at prosjektet starta nede ved Ølen Storkiosk, og påpeika at han ikkje synest krysset med avkøyringa til Sandeid er eit bra kryss slik det er no. Ordførar Ole Johan Vierdal (Sp) sa seg delvis einig, men understreka at prosjektet har blitt forlenga frå Tveit, oppforbi Fatland og ned til sentrum – men ikkje heilt til krysset.
Ønskjer betre forhold for syklistar
Annonse
Varaordførar Gustav Løge Fosse (KrF) kalla prosjektet ein etterlengta utbetring. Som ved tidlegare høve ville han likevel beklage at dei ikkje får på plass ei fullgod løysing for mjuke trafikkantar.
— Det hadde vore veldig kjekt å fått gang- og sykkelveg, sa Løge Fosse.
Han understreka at han kjenner til turvegen som går over Fikse. Vidare spurde han seg om dei burde sjå på høvet for å oppgradere denne litt. Samtidig er han glad for at det no blir ein god vegskulder på E134, som gir høve til å sykle tryggare enn på dagens veg. Han poengterte at det å vere syklist i vegkanten med trailerar som kjem i 70–80 kilometer i timen, ikkje er ei ideell løysing.
