Jamn straum også til kyrkjevalet
Det er ikkje berre kommuneval og fylkestingsval ein kan vera med å stemme på, og i røystelokala på Skakke finn ein også valurna til kyrkjevalet 2023. Så langt har det vore ein jamn straum også her.
Ved valurna til kyrkjevalet i Etne sit Arnold Solheim, Liv Sørheim og Astrid Harboe frå soknerådet i Etne. Dei har nettopp hatt vaktskifte, og er klare for å hjelpa folk med å stemme til kyrkjevalet 2023. Elisabeth Vae Haaland som nettopp er ferdig med skiftet kan opplysa at tilsiget av folk som vil stemme ved kyrkjevalet har gjennom heile dagen vore jamt, sjølv om mange har nytta seg av digital stemmegiving som er nytt av året.
Første gong digitalt
Annonse
På landsbasis er det i følgje Den norske kyrkja meir enn 91.000 personar som har førehandsstemt digitalt i Kyrkjevalet, og fleire har også førehandsstemt manuelt på gamlemåten.
Den norske kyrkja er med sine meir enn 3,5 millionar medlemmar det største medlemsdemokratiet i Noreg.
I kyrkjevalet får kyrkjemedlemmene velja kven som skal styra Den norske kyrkja dei fire neste åra, og medlem i Den norske kyrkja som er busett i Noreg har stemmerett frå det året dei fyller 15 år. Lokalt skal det veljast sokneråd, regionalt skal det veljast bispedømeråd og Kyrkjemøte er nasjonalt.
2.700 vallokale
Annonse
På valdagen i dag er det mogleg å stemma til kyrkjevalet i 2.700 vallokale i Noreg, og dei aller fleste av lokala er i nær tilknyting til det offentlege valet.
