Inviterer til open veg-dag

Det er Medvind24 som melder dette på sine heimesider, og invitasjonen er mynta på både råka grunneigarar og andre interesserte som ønskjer å vita meir om prosjektet rundt gul stripe» frå Ølen til Mørkeli i Etne.

Utbetringa av ulukke-strekninga er sterkt ønskt frå mange hald, ikkje minst for å sikra ein tryggare og breiare veg. No er planane ute på høyring, i første omgang gjeld det strekninga mellom Ølen og Mørkeli. Om ikkje lenge er det også oppstart i planlegginga av den andre delen av strekninga, nemleg mellom Mørkeli og Gjerde.

På open dag håpar Statens vegvesen å vere tilgjengelege for grunneigarane som har spørsmål, og her kan dei gå gjennom teikningar i prosjektet, og presentera problemstillingar rundt avkøyrsler med meir. Det fortel planleggingsleiar i Statens vegvesen, Elisabeth Danielsen.

Ope for alle

Både ho og prosjektleiar Arild Vallestad skryt over møtet dei arrangerte i mars 2022, her kom det mange gode innspel som har blitt med vidare i prosjektet. Vegutbetringa har som hovudmål å sikre betre trafikktryggleik, med betre vegbreidde, grøfteprofil og ein forsterka midt – og kantoppmerking.

— Me håpar alle som er interesserte kjem innom oss i desember, arrangementet er ope for alle, seier Vallestad medan Danielsen peikar på at eit fysisk møte med grunneigarane kan ha stor verdi.

— Det er viktig at dei som er råka av dette får lov til å stille spørsmål, og me trur jo at det er lettare å forstå planane dersom dei får snakke med oss, og ikkje berre sjå teikningane på ei nettside, slår ho fast til Medvind24.

Betre kryss

I tillegg til sjølve vegutbetringa skal ein også bygge to kanaliserte kryss, eit på Fikse og eit i Hiksdal, også dette for å gjere trafikkflyten tryggare og kryssa meir oversiktlege. Arbeidet skal etter planen starte opp i 2024.

— Truleg tar det 2-3 år før me er i mål, når me skal utbetre rundt fem kilometer med veg tar det naturlegvis litt tid, seier Vallestad.

Den 11. desember er vegvesenet å treffa i Ølensvåg frå kl. 12 til 18 på kvelden.