Inviterer til kraftsamling

— Me samlar næringslivet til nok ein kveld med fokus på fornybar kraft, nett, næringsliv og energiløysingar for framtida — og me serverer sjølvsagt kveldsmat, skriv Medvind24 på si nettside.

Arrangementet blir halde i svingen-delen av Fugl Fønix Hotell. Påmeldingsfristen er 28. november.

Kraftbehov i regionen

Myndigheitskontakt og leiar for rammevilkår, Magne Andresen i SKL, skal fortelje om kraftmarknaden, med fokus på korleis det heile fungerer og heng saman. Han skal også snakke om SKL sin aktivitet og prosjekt.

Haugaland Kraft har to representantar på møtet. Prosjektleiar for IT og teknologi, John Arild Arnø i nettselskapet deira, Fagne, skal snakke om nettselskapet si rolle. Tittelen på innlegget hans er: Korleis tilpassar Fagne seg kraftbehova i regionen framover?»

Prosjektutviklar Kari-Marie Høyvik Holmstrøm skal fortelje om fleksibilitetsmarknaden. Ho skal forklare kva det er og korleis ein kan dra nytte av han.

Ny type vindkraft

Det siste innslaget på plakaten handlar om høgdevindkraft. Voss-etablerte Kitemill har utvikla eigen teknologi for utnytting av luftbåren vindenergi.

Selskapet blei stifta i 2008. I 2024 omtala bransjenettstaden Shifter dei som verdsleiande innan høgdevind-teknologi, og skriv at selskapet utviklar teknologi for høgvind-produksjon som skal gjera det mindre ressurs- og arealkrevjande å produsera store mengder straum samanlikna med dagens vindturbinløysingar.

Vindselskapet frå Voss skal produsera straum ved hjelp av dragar (kiter) som er 250–300 meter oppe i lufta. Nede på bakken er dragen festa til ein vinsj gjennom ei line. I vinsjen er det ein generator som produserer straum — jo høgare dragen flyg, jo meir straum produserer han.

Shifter skriv at gjennom eit pilotprosjekt har Kitemill vist at det fungerer.