Ikkje tilfreds med Statnett-utgreiing

Ein endringssøknad for kraftleidning Blåfalli – Gismarvik er no ute på høyring, og det er relativt små endringar i søknaden for Etne kommune sin del. Hovudtraseen for leidninga og systemløysinga er den same som tidlegare. Innspela om kabling og bruk av dagens trasé Sauda – Gismarvik er kommentert, men ligg ikkje inne i søknaden frå Statnett si side.

Kommunedirektør Bjørn Tollefsen uttalar seg om søknaden som ligg på bordet og er positiv til delar av planane, men ikkje til løysinga for strekninga Litledalen – Mostølen, der det er lagt inn diverse vilkår for vidare utgreiingsarbeid.

— Eg har limt inn tre paragrafar frå naturmangfaldlova, for eg synest ikkje det er godt nok i forhold til det som ligg i lovverket. Me bør minne om formalitetane. Statnett har ikkje skrive eller sagt så mykje om verknadane på inngrep i naturen, og det er summen av inngrepa og økosystemet som skal liggja til grunn for ei avgjerd. Då må det også visast. Når det er statlege etatar som bestemmer, må dei halda seg til dette lovverket. Dei seier dei skal bruka lovverket som alle andre, men då må det også få nokre skriftlege utslag, sa Erik Kvalheim som handsama saka for kommunen, då han informerte formannskapet tysdag.

Han legg til at han tvilar på viljen Statnett viser til verkeleg å innsjå det store inngrepet dette vil bli for kommunen.

Ikkje tillit til Statnett

Varaordførar Kenneth Karlsen (Frp) sat med ordførarklubba då denne endringssøknaden kom opp i formannskapet. Både ordførar Mette Heidi Ekrheim Bergsvåg (Sp) og Siri Klokkerstuen (Ap) blei erklærte inhabile i saka.

— Innspelet me hadde i førre runde som omhandla jord- og sjøkabelalternativet, er heller ikkje tilfredsstillande utgreidd. Statnett operer også med tekst i høyringsdokumenta som seier noko om at dei er usikre på kva kostnadane er, og usikre på korleis dette alternativet vil bli. Når Statnett i ein slik runde vel å svara på våre krav om utgreiingar, med at dei er usikre på informasjonen dei gir, peikar det mot at dei ikkje har utgreidd saka, seier Karlsen.

Kristin Golf (V) uttalar at tilliten til Statnett er dårleg.

— Statnett snor seg unna med språk, og dei reknar ikkje kostnadane på rett måte. Etne er ikkje åleine om frustrasjon rundt monstermaster, seier ho og viser til eksempel i Bærum der dei har bede om ekstern kvalitetssikring av berekningane rundt samfunnsøkonomiske konsekvensar for kablar. Kommunedirektøren i Bærum påpeikar at analysane Statnett og NVE har framlagt ikkje er fullverdige, og at det dermed ikkje føreligg eit godt nok grunnlag til å konkludera med at luftspenn klart er ei meir rasjonell løysing enn jordkabelalternativet.

— Etne kommune må stå veldig hardt på kravet om at me vil ha ei mykje meir realistisk utgreiing jord- og sjøkabel, enn det som så langt er gjort, seier Golf.

Vil ha utgreiing

— Det er ingen her som ønskjer kraftleidningsalternativet, og me meiner framleis at jord- og sjøkabelalternativet bør bli utgreidd, seier Kari Aakra (Sp), som saman med Høgre og KrF har laga eit felles endringsforslag der dei påpeikar at ei skikkeleg utgreiing av sjøkabel som eit godt alternativ for Etne er nødvendig. Så langt har utgreiinga ikkje vore tilfredsstillande.

— Endringa i Statnett sin tilleggssøknad forandrar ikkje konsekvensane utbygginga får for naturen i Etne kommune, seier Aakra.

I endringsforslaget til Sp, Høgre og KrF understrekar dei at det ville vore eit godt alternativ for kommunen å oppnå målsetnaden med å transportera ut straum, samtidig med at dei også skånar verdifull og uerstatteleg natur. I søknaden frå Statnett, kan ikkje partia sjå at dette er tilfredsstillande, og ber Statnett på ny om å greia ut jord- og sjøkabelalternativet.

Negative verknader

Omsøkte tiltak vil ha store negative verknader på landskap og andre interesser i kommunen. Endringane i tilleggssøknaden endrar ikkje på dei negative konsekvensane for Strypefjellet, av den grunn at mastene ikkje blir mindre synlege av endringane. Konsekvensane for det rike dyre- og fuglelivet i området er ikkje tatt omsyn til.

Dei tre partia påpeikar også at Statnett viser til eksisterande barmarksløyper» frå Strypefjellet til Røde Kors-hytta, men slikt eksisterer derimot ikkje i området. Det går ein sti, men definisjonen på barmarksløype eit køyrespor/traktorveg i utmark kor motorisert ferdsel på barmark er tillate for ålmenta.»

Stor auke i kostnader

I sitt forslag krev formannskapet at strekninga Litledalen – Mostølen blir greidd ut vidare, og får ei meir skånsam løysing enn den som ligg føre. Politikarane krev også at Etne kommune får ta del i eit slikt utgreiingsarbeid, og at konsulentkompetanse innan natur og landskap må koplast på. Statnett må også visa vilje til å akseptera ei relativt stor auke i anleggskostnadar for den omtalte strekninga.

Dei krev også at NVE snarast mogleg inviterer til folkemøte i Etne, grunna behovet for meir informasjon. Motstanden mot 420 kV-linja blant innbyggjarane er stor, påpeikar dei.

Senterpartiet, Høgre og Kristeleg Folkeparti fekk fleirtal for forslaget sitt, som no går vidare til kommunestyret.