Turvegen Olalia-Rus
Idrettslaget snur – vil jobbe vidare med turvegen
Torsdag skreiv Grannar at Ølen IL gav opp turveg-prosjektet mellom Olalia i Vindafjord og Rus i Etne, etter ein klage frå Statsforvaltaren. Men etter å ha blitt nedringt av støttespelarar, har idrettslaget bestemt seg for å jobbe vidare med prosjektet likevel.
— Me gir oss ikkje likevel, seier Arne Gunnar Habbestad.
Grannar skreiv i nettutgåva torsdag at Ølen IL ville gi opp det omstridde turveg-prosjektet mellom Rus i Etne og Olalia i Vindafjord. Dette fordi Statsforvaltaren har klaga på vedtaket til Etne kommunestyre, der blei gitt dispensasjon frå gjeldande arealformål i det aktuelle området.
Annonse
Artikkelen i Grannar har skapt glede blant motstandarane til prosjektet, men fekk ifølgje Habbestad også mange støttespelarar til å reagere.
— Eg har nesten ikkje gjort anna enn å sitje i telefonen etter at artikkelen blei publisert. Og no har me tenkt oss om ein gong til, og landa på at me ikkje vil gi oss likevel, seier Habbestad til Grannar fredag.
Habbestad har leia arbeidet med turvegen i lang tid, og medgir at han var nedtrykt etter å ha lest klagen frå Statsforvaltaren, og at han der og då var lei heile saka. Og at det var bakgrunnen for at det blei bestemt å gi opp prosjektet.
Avtalar går ut på dato
Annonse
Men no har altså støttespelarar gitt han og resten av organisasjonen som jobbar med prosjektet ny energi.
— Det er jo dessutan vanskeleg å spå om det står krefter klare til å om nokre år på ny gå i gang med alt arbeidet som trengs for å lage nye avtalar med grunneigarar, skrive spelemiddel-søknadar og liknande, seier han.
Les alle artiklane om prosjektet: Turvegen Olalia-Rus
Dette er ting som er på plass i dag, men det er avtalar som går ut på dato.
Går i dialog med kommunen
Idrettslaget vil no gå i dialog med Etne kommune i høve til å svare opp på klagane som er kome inn. Frå før er det kjent at også Haugesund Turistforeining har klage på vedtaket.
Annonse
Om kommunen vel å avvise klagene som er komne inn, vil det truleg bli ein setjestatsforvaltar som til slutt skal handsame desse. I siste instans kan tiltakshavar også kople på Sivilombodet om dei meiner at Statsforvaltaren har nytta lovverket på feil måte.
— Skrivebordsvedtak
Korleis klagane blir svara opp av Etne kommune er ikkje klart, men Arne Gunnar Habbestad seier for eiga rekning at han meiner Statsforvaltaren har gjort eit for enkelt skrivebordsarbeid i si klage. Han etterlyser å vurdere fordelane grundig nok opp mot ulempene i tiltaket. Og at dei stiller spørsmålsteikn ved at Statsforvaltaren overprøver den lokale villreinnemnda i spørsmålet om i kva grad tiltaket vil vere til hinder for villrein.
Først når endelege vedtak ligg føre i høve til klagene på kommunestyret sitt vedtak, vil det gå ein tilsvarande søknad til Vindafjord kommune, opplyser Habbestad.
