I gang med E134-tunnel
Måndag trykte ordførar Roald Aga Haug i Ullensvang kommune på utløysarknappen som markerte starten for drivinga av den nye Røldalstunnelen. Den 12,4 kilometer lange eittløpstunnelen på E134 skal bli den fjerde lengste tunnelen i Noreg.
— I dag kan me endeleg feire at me er eit steg nærare å gjere fjellovergangen E134 til ein tryggare transportåre mellom aust og vest, seier utbyggingsdirektør Kjell Inge Davik i ei pressemelding måndag.
Vegprosjektet skal gjere fjellovergangen E134 til ein meir føreseieleg reiseveg året rundt, og fjernar også 1.000 høgdemeter på strekninga.
Annonse
Krevjande arbeid
Den nye Røldalstunnelen blir over 12 kilometer lang og krev difor ei eiga godkjenning etter tunnelsikkerheitsforskrifta. For å sikre trygg ferdsel for alle køyretøy, har prosjektet også prosjektert fem store, sirkulære snunisjar som er dimensjonerte for at modulvogntog skal kunne snu.
I tillegg kjem to snunisjar for brøytebilar ved tunnelmunningane, noko som vil gjere vinterdrifta enklare.
— Dette er den lengste vegtunnelen i landet der entreprenøren sjølv har utarbeidd søknad om tryggleiksgodkjenning. Det har vore eit krevjande arbeid, men arbeidsfellesskapet har levert eit godt stykke arbeid, seier prosjektleiar Frode Lykkebø.
Annonse
Vegomlegging
Når påhogget er klart i slutten av oktober, startar entreprenøren også driving frå austsida ved Vetlehovden på Liamyrane, slik at tunnelarbeidet skjer frå begge endar.
— Utover hausten blir det viktig å finne ein god rytme i tunnelarbeidet. Boring, sprenging, sikring og utlasting må gå saumlaust for å sikre effektiv drift, forklarar Lykkebø.
Hausten fører også med seg endringar i vegnettet ved Liamyrane. Allereie før jul blir det vegopning med permanent omlegging av trafikken til det som i framtida skal bli Riksveg 13. Omlegginga vil sikre god trafikkflyt, også når dumparane fraktar stein ut frå fjellet.
Kortar ned køyretida
Prosjektet er ei totalentreprise og omfattar prosjektering og bygging av eittløpstunnel mellom Seljestad og Røldal, med dagsoner og kryss i kvar ende. 31. mars signerte Statens vegvesen kontrakt med arbeidsfellesskapet Bertelsen & Garpestad AS og Metrostav Norge AS.
Annonse
Kontrakten omfattar bygging av:
• 1,7 kilometer ny veg i dagen på Liamyrane ved Røldal.
• 1,2 kilometer ny veg i dagen på Seljestad, samt gang- og sykkelveg på om lag 0,7 kilometer.
• Ny tunnel mellom Liamyrane og Seljestad på om lag 12,4 kilometer.
• Diverse konstruksjonar i tilknyting til veganlegget.
Ny veg vil gi:
• Ei innkorting av køyrelengda på 6,4 kilometer.
• Redusert reisetid på om lag 18 minutt for tunge køyretøy og om lag 12 minutt for personbilar.
• Ein ny Røldalstunnel på om lag 12,4 kilometer, som skal erstatte dagens Røldalstunnel og Seljestadtunnelen, samt dei tunge stigningane i Håradalen.
• Ei tilnærma flat helling.
• Ein ny og stor kolonneoppstillingsplass på Liamyrane.
