I full gang med nytt prosjekt frå Skjold til Vats: — Me hadde ikkje starta på dette utan samarbeidet
Første trinn av ny hovudvassleidning, høgspentkabel og fiberkabel mellom Skjold og Vats er i full sving og er venta stå ferdig til sommaren.
— Nå legg me fire kilometer med ny hovudvassleidning. Det er eit samarbeid mellom Vindafjord kommune, Fagne og Haugaland Kraft Fiber. Fagne legg ned ny høgspentlinje og Haugaland Kraft legg ned fiber, fortel prosjektleiar for vassprosjektet i Vindafjord kommune, Willy Skulerud.
Den nye hovudvassleidninga skal i første omgang gå fram til Knapphus. I neste runde skal det byggjast ytterlegare ein kilometer med vassleidning fram til bustadfeltet på Knapphus. Det skal også byggjast eit høgdebasseng mellom Skjold og Knapphus.
Annonse
Bakgrunn for vassprosjektet er nye krav til reservevatn. I drikkevassforskrifta sitt avsnitt om leveringssikkerheit heiter det at vassverkeigar skal sikra at det finst ei alternativ vassforsyning som opprettheld leveransen av drikkevatn når den ordinære vassforsyninga sviktar. Alternativ drikkevassforsyning inkluderer reservevassforsyning og/eller naudvassforsyning, og skal sikra at alle abonnentane får levert tilstrekkeleg mengder drikkevatn til ei kvar tid.
— Det blei vedtatt ny forskrift om reservevatn og nå legg me det opp slik at Skjold blir reservevatn til Vats, og omvendt, seier Skulerud.
Spleiselag
Heile prosjektet er venta å kosta 30 millionar kroner, og skal fordelast mellom dei tre aktørane.
Annonse
— Me hadde ikkje starta på dette utan samarbeidet. Fagne hadde behov for å skifta ut høgspentlinja og då blei me med. Og så ville Haugaland Kraft Fiber også vera med, seier prosjektleiaren.
Når reservevassprosjektet mellom Skjold og Vats er ferdig står andre bygder for tur. Først ut er strekninga Sandeid-Vikedal.
— Me har planar for andre bygder, og tek Vikedal-Sandeid i neste omgang. Dette vil skje i samarbeid med Rogaland Fylkeskommune når det skal byggjast ny veg og tunell. Tunellen er avhengig av vatn for brannsløkking, seier Skulerud.
