Høg trivselfaktor på dagsenteret

Det er onsdag føremiddag og tid for det faste treffet på dagsenteret på Vindafjordtunet. Suppegryta er sett på kok og inne på dagsenteravdelinga Tjort står lunsjbordet ferdigdekka. Denne dagen står som vanleg lunsj, middag, kaffikos, Bingo og ein liten spasertur innomhus på programmet. Men aller viktigast denne dagen er den gode praten om laust og fast, og latteren set laust når småskrøner og potetkvalitet blir tema under lunsjen.

Etter lunsj er det tid for ei lita arbeidsøkt der bretting av handkle vanlegvis står på arbeidslista, og når pliktene er unnagjort passar det fint å slappa av med ein runde bingo. Straks spelebrettet kjem på bordet blir den pratesalege gjengen fort stille og konsentrerer seg om å fest blikket på bingotavla der tala rullar over skjermen.

— Nå må me konsentrera oss, smiler Brit Ohm og finn fram lupa for å få eit klarare blikk på brettet ho har liggjande på bordet.