Hentar inn hjelp utanfrå
Windafjord Port/Dommersens AS planlegg å sette i gang med arbeidet med fase 1 av planane sine på Dommersnes Industriområde i oktober, men løyvet har blitt klaga inn til Sivilombodet. Vindafjord kommune vil få ei vurdering av kommuneadvokaten til Karmøy på om anleggsarbeidet må vente.
— Me har bestilt ei uavhengig vurdering, sa kommunalsjef Halfdan Krohn Brekke for samfunnsutvikling under eit møte i Utval for drift, utvikling og kultur (DUK) måndag.
Vil starte i oktober
Annonse
15. april opprettheldt DUK vedtaket om å gi Windafjord Port dispensasjon og løyve til planering av eit 54 dekar stort område på Dommersnes industriområde i Vikebygd. Dette er fase 1 i Windafjord Port sine planar om å utvikle området. Statsforvaltaren i Rogaland valde seinare å oppretthalde kommunen sitt vedtak.
Dagleg leiar Jørgen Jorde i Windafjord Port opplyser at selskapet held på med detaljplanlegging. Han fortel at planen er å starte med anleggsarbeid i oktober og at varigheita ikkje er avklart ennå.
— Me ser for oss å starte forsiktig, og vurdere kor fort me kan ta ut og avhende massane undervegs, forklarar Jorde.
Fase 1 er første steg i planane om utvikling av industriområdet på Dommersnes til potensiell serieproduksjon til havvindnæringa, og omhandlar tidlegare nytta område. Fase 2 legg opp til å ta enda meir areal i bruk, mens fase 3 vil krevje alle dei over 500 måla som regulerte til industri og at Vikevegen blir lagt om. For fase 2 og 3 er det starta ein prosess er med ny reguleringsplan.
Annonse
Vindafjord kommune og Westcon eig kvar sin halvdel av Windafjord Port.
Krev stans
Foreininga Bevar Ålfjordens Perle og landskapsarkitekt May Britt Vikingstad klaga 29. juli Vindafjord kommune sitt vedtak om fase 1 inn til Sivilombodet.
Klagarane har bedt om ei juridisk og objektiv vurdering av sakshandsaminga, samt gyldigheita av vedtaket i forhold til plan- og bygningslova. Dei meiner at det var mangelfullt plangrunnlag og at dispensasjonen var ugyldig. Andre sentrale element i klaga er konsekvensar for naturmangfald, så vel som støy og landskapsproblematikk. Klagarane reiser også spørsmål ved habiliteten til både Statsforvaltaren i Rogaland, i og med at Statsforvaltaren i Rogaland også har klaga på byggeløyvet, og Vindafjord kommune, som eigar 50 prosent av Windafjord Port.
20. august sendte Sivilombodet eit førebels svar om at dei nå vil vurdere om klagen gir grunnlag for vidare behandling. Sivilombodet lova å komme med skriftleg beskjed om si avgjerd innan 10-12 veker. 21. august sendte klagarane ein e-post til Vindafjord kommune der dei krev at kommunen gjer eit vedtak om utsett iverksetjing av tiltak, altså at Windafjord Port ikkje får lov å starta fysisk sprenging, knusing og planeringsarbeid av fase 1 i påvente av handsaming av klagen hos Sivilombodet.
I samband med spørsmålet om eit slikt vedtak av å halde igjen tiltaket har Vindafjord kommune engasjert kommuneadvokaten til Karmøy til å komme med ei uttale. Kommunalsjef Halfdan Krohn Brekke for samfunnsutvikling opplyser at det vil bli avgjort neste veke om Windafjord Port må vente på Sivilombodet si behandling.
