Hengebjørk» frå trubaduren

Fredag 22. mars kom siste singel frå Magne Skålnes ut på strøymetenestene og er eit produkt som delvis er spelt inn i Mjøndalen, og delvis i Etne.

— Det er Donkeyboy-gitarist og låtskrivar Peter Mivhelsen som har produsert songen i studioet sitt hos The Norwegian Sound i Mjøndalen, og eg sende ein demo dit for ei tid tilbake sidan, og fekk tilbake eit godt tilbod om innspeling, seier Skålnes.

Mens musikken er spelt inn i Mjøndalen har trubaduren Skålnes spelt inn vokal og munnspel i ABC-studio i Etne. Musikken på singelen er i regi av Oslo Brandlaug, og med på låten er lokale Mari Aalmo, som er ei dame Magne Skålnes jobbar med til dagleg i Ølensjøen barnehage.

Heim

Sidan juli 2023 har trubaduren gitt ut åtte låtar han har hatt liggjande. Nokre av låtane har han hatt liggande i over 20 år, og alle er på norsk dialekt. Tettast til brystet ligg nok låten Heim, som har sitt utspring i Åkrafjorden som var plassen Magne Skålnes vaks opp, og som han no i vaksen alder har flytta tilbake til. Sjølv om fleire av låtane er gamle for Skålnes, er dei nye for publikum, og sidan han starta å gi ut låtar på strøymetenestene i fjor sommar, har låtane hans hatt over 100.000 avspelingar på Spotify.

Hengebjørk blir den første splitter nye innspelinga han gir ut, men han lovar meir. I juni reiser han tilbake til Mjøndalen for å spela inn eit knippe nye låtar som vil bli utgitt komande haust og vinter.

Grand Prix

Musikk har stått Magen Skålnes nært i mange år, men det var først då han kom i 20-årsalderen han byrja å gjera noko kreativt med interessa. Han starta med å læras eg gitarspel, og etterkvart fekk han kontakt med Glenn Kringlebotten frå Etne som blei hans kompanjong i musikkbransjen. Saman reiste dei rundt og spelte i saman, og dei produserte også musikk i lag. Noko av det som fekk litt fart på karrieren i starten var at ein låt dei hadde laga, nådde opp til finalen i den norske Melodi Grand Prix.

— Me skreiv ein song som heitte Roser i regn, og så sende me han inn til MGP. Av 400 innsende bidrag, kom vårt bidrag gjennom nålauga. Det var stas, seier trubaduren.

Artisten som framførte Roser i regn på scenen var Toni Gundersen, men både Kringlebotten og Skålnes fekk billett til både Oslo og melodifestivalen det året.

— Me sat i greenroom i lag med alle deltakarane og følgde med på heile konkurransen. Etterpå fekk me våre 15 minuttar i rampelyset, men så var det over, like fort som det hadde begynt, seier Skålnes.

Det var i 1993 dei var med i MGP, og vinnaren det året blei Silje Vige som song Alle mine tankar. Blant artistane det året var det fleire store namn som; Tor Endresen, Jan Teigen, Merethe Trøan, Rune Larsen, Helge Nilsen, Kim Fairchild og New Jordal Swingers. At Roser i regn hamna på ein fjerdeplass blant alle desse, er Skålnes ganske stolt over.

Band

Å vera trubadur er noko han likar godt, og han har gjennom året 2-3 oppdrag kvar einaste månad. Alt frå å spela på pubar, spela til dansar eller arrangement, eller bryllaup og liknande. Det beste er når han får trø i gang ein skikkeleg Bruce Springsteen-hyllest til publikum, for er det ein artist som tronar over alle andre, så er det nettopp han. Og oppdraga kjem frå heile Vestlandskysten.

Det siste prosjektet i rekkja for Skålnes er eit samarbeid med fleire andre lokale og kjende musikarar.

— Eg blei hyrt inn til Kulturnatt i Etne for å spela eigne låtar i februar, og då fekk eg med meg fleire lokale musikarar frå distriktet. Me kalla oss Magne Skålnes-band og hadde konsert i kinosalen. Snakk om opptur! Det var utruleg kjekt, så nå har me planar om å halda litt på den kontakten, og halda fleire konsertar, seier han, og legg til at med seg på laget har han Arne Haugen på trommer, Anders Lunde på bass, Rune Rødne på piano, Morten Rødne på gitar og Mari Aalmo på song. Det er ein rutinert gjeng og Skålnes fortel at tilbakemeldingane dei fekk på konserten var kjempegode. Nå ser han fram mot nye musikalske prosjekt.