Heimelaga etasjefat til kvardag og fest

I kjellaren heime i huset sitt midt i Skånevik sentrum har Egle Emmerhoff Nilsen sitt eige hobbyrom. Her kan ho trekkja seg tilbake når skapartrongen pressar på, og her kan ho jobba i fred og ro utan å forstyrra resten av familien. For når den kreative læraren frå Skånevik, som opphavleg kjem frå Estland, finn fram drillen og diamantboret ho brukar for å bora små hol i botnen av knallharde porselensfat og tjukke glasskåler, går det verken stillferdig eller støvfritt føre seg.

— Det bråkar og støvar. Når det er fint vêr om sommaren held eg til ute, men elles brukar eg hobbyrommet i kjellaren. Det er ein kjekk hobby, men det er litt einsamt, seier Egle Emmerhoff Nilsen og demonstrerer korleis dei elegante etasjefata blir til.

Første steg er å velja ut fat, skåler og koppar i ulik storleik. Farge, mønster og stilart spelar ei viktig rolle for korleis resultatet vil bli, og når valet er tatt startar arbeidet med å bora eit lite hol i botnen som passar til byggesettet som bind fata saman. Teknikken har ho lært seg sjølv gjennom prøving og feiling, og det skal ei stødig hand til for å unngå sprekker.