Håvard (24) blir Vindafjord sin mann i fylket

— Eg trur det blir spennande å sitte i fylkestinget. Det blir ein litt anna måte å jobbe på enn det eg gjer i kommunestyret. Her må ein jobbe litt meir langsiktig og strategisk, heller enn med enkeltsaker. Ein må sjå fylket i ein felles samanheng, seier Håvard Rørtveit (H).

Sandeidbuen sit i dag i kommunestyret i Vindafjord og er medlem av utval for oppvekst og omsorg (OPOM). I kvardagen er han student på Universitet i Bergen.

Det blei ein spennande måndagskveld for Rørtveit. Han var med på den felles valvaka i Vindafjord på rådhuset i Ølen. Der heldt han eit auga på både kommunevalet, fylkestingsvalet og dei samla nasjonale resultata. Nasjonalt kunne Høgre-gruppa juble for å ha blitt Noregs største parti ved eit val for første gong sidan 1924, mens dei verka litt skuffa over å ikkje ha greidd å vekse frå dagens fem mandatar i kommunestyret. Kva gjeld fylkestinget blei det neglebiting for Rørtveit.

— Eg låg vaken i natt til dei hadde talt opp alle stemmene. Det var mitt mandat som stod i fare, så nå er eg litt letta, fortel sandeidbuen.

I fylkestingsval er det tillate med personstemmer, men ei sperregrense på åtte prosent gjer at det i praksis blir dei rekkefølgene partia har sett opp sjølv, med mindre nokon kandidatar får heilt ekstraordinært mange personstemmer. På tysdag blir det gjort finteljing av stemmene. Rørtveit har fått høyre at det siste mandatet, som sikrar han plass i fylkestinget, er ganske trygt, med cirka 1.500 stemmer i margin. Han understrekar likevel at mandatfordelinga ikkje blir 100 prosent stadfesta før tysdag kveld.

I dag har Vindafjord fylkesvaraordføraren i Rogaland i Arne Bergsvåg (Sp), men han stilte ikkje til attval for ein ny periode. Dermed blir Rørtveit den einaste frå Vindafjord i det kommande fylkestinget.

— Eg skulle helst hatt lokale kollegaer, men det går vel litt i bølgjer, seier Rørtveit.

Han er tydeleg på at det er eit viktig prinsipp for politikarar i fylkestinget å tenke regionalt, og at arbeidsoppgåva hans blir å jobbe saman i Høgre si gruppe for å sikre gode tenester i heile fylket. Likevel satsar han på å sørge for at folk i Vindafjord som har noko dei vil ta opp i fylket skal få ein kanal.

— Eg håpar å vere ein tilgjengeleg representant som tek innspel vidare, fortel sandeidbuen.

Allereie i valkampen har han fått diverse innspel. Blant desse er ønske om å få oppretta eit anleggsteknikk-tilbod for elevar i sitt andre år på Ølen vgs. Det er sendt ein søknad.

— Det hadde vore veldig kjekt å fått til, seier Rørtveit.

Kva gjeld saksfelt, trekk Rørtveit fram samferdsel og opplæring som to felt han ser spesielt fram til å jobbe med. Han tar gjerne plass i eit utval som jobbar med dette, men understrekar at han vil gjere ein god innsats uansett kva utval han eventuelt hamnar i.

For Høgre sin del blei det eit godt fylkestingsval, der dei sit igjen som det største partiet etter å ha fått 28,1 prosent av stemmene. Det gir dei 14 mandatar, fire mandatar meir enn Ap som er nest størst. Rørtveit fortel at det har blitt forhandla i løpet av natta, og at partigruppa skal ha eit digitalt orienteringsmøte tysdag kveld.