Samferdsel
Håpar på start neste vår
Den mykje etterlengta oppgraderinga av fylkesveg 548 Skånevik-Flesjo er eitt steg nærmare å bli realisert. Går alt etter planen kan det bli oppstart neste vår.
— Ein satsar på første spadestikk tidleg på våren 2026, opplyste kommunalsjef Eileen Selland då ho orienterte formannskapet om arbeidet med vegstrekninga Skånevik- Flesjo.
Arbeidet vil starte ved omsorgssenteret i Skånevik og fortsetja fram til Ytre Nes. Grunnervervet er i gang og så snart alt er på plass kan anbodsrunden ta til.
Annonse
— Det blir ein totalenterprise og utlysing blir i haust, sa Selland.
Anleggstida vil truleg bli mellom 18 og 20 månader. I denne perioden må vegfarande belaga seg på både venting og omkøyring via Strondavegen. For å stå betre rusta mot aukande trafikk langs Strondavegen vil enkelte parti bli utbetra.
— Det vil bli utbetring på fire til fem punkt. Dette skal vera ferdig i november i år, sa ho.
For å unngå unødvendig vegstenging i dei mest trafikkerte tidspunkta på dagen vil arbeidet ta omsyn til ferjerutene og det vil bli forsøkt å halda vegen open når ferjene kjem.
