E134
Gul stripe» kan bli utsett igjen
Anleggsarbeidet med breiddeutviding på E134 mellom Etne og Ølen skulle eigentleg starte i fjor, men gjekk på eit skjær då Statsforvaltaren hadde motsegn til planen. Det er rydda opp i, men no kan ein førebels mangel på binding av statlege midlar stå i vegen for oppstart i år.
Gul stripe»-prosjektet handlar kort forklart om breiddeutviding og utretting av nokre av dei farlege skjeringane på dagens E134 mellom Ølen og Mørkeli-krysset på austsida av Fikse. Ifølgje prosjektleiar Johannes Handeland i Statens vegvesen er det venta at kommunestyra i Etne og Vindafjord får forslaget til reguleringsplan til handsaming i april.
— Me jobbar med saka no, seier Handeland.
Annonse
Mindre merknadar
Prosjektet har nyleg vore ute på ein ny høyringsrunde. Vegvesenet jobbar no med å svare på dei siste merknadene, som ifølgje Handeland er mindre justeringar som neppe vil utsetje framdrifta. I første høyringsrunde hadde Statsforvaltaren i Rogaland fleire motsegner knytt til vassdragsproblematikk, men desse har partane no kome til semje om, og motsegnene er trekte.
Med eit positivt vedtak i kommunestyra i april, håpar Vegvesenet å kunne legge prosjektet ut på anbod til hausten. I så fall kan bygginga starte i løpet av året, seier Handeland.
Han presiserer likevel at staten først må gjere eit bindande vedtak om finansieringa.
Annonse
— Før me kan legge prosjektet ut på anbod, må Statens vegvesen binde statlege midlar til finansieringa til prosjektet, forklarer han.
Interne konkurrentar
Prosjektet har fått 100 millionar kroner i løyving frå bompengeprosjektet Haugalandspakken, medan staten skal finansiere resten. Dette kan vere snakk om ein sum med storleik opp mot bompengedelen.
Men samtidig har Statens vegvesen region Vest også andre prosjekt på gang som ventar på binding av statlege midlar. Mellom anna gang- og sykkelveg samt breiddeutviding av E39 mellom Gismarvik og Aksdal i Tysvær. Dette kan i praksis bli ein konkurrent om å kome fremst i køen om statlege midlar.
Opphavleg var byggjestarten for Gul stripe»-prosjektet planlagt i 2024, men motsegna frå Statsforvaltaren har forseinka framdrifta. Mange håpar no at trafikantane slepp å leve med den farlege og ulykkesbelasta vegen mellom Ølen og Etne i enno eit år.
— Styringsgruppa for Haugalandspakken er på» og masar veldig på at prosjektet må kome i gang. Det er både viktig og bra at dei gjer det, legg Handeland til.
Annonse
Har forventningar
Etne-ordførar Mette Heidi Bergsvåg Ekrheim (Sp), som sit i styringsgruppa for Haugalandspakken konstaterer at dei finansielle innretningane for vegprosjekt er slik som prosjektleiaren skisserer.
— Men me kan ikkje krevje inn bompengar utan at me får statlege midlar til å gjennomføre prosjekta. Dei er jo lagt inn i Haugalandspakken med velsigning frå staten, påpeikar ho.
Ekrheim trekk også fram at samanlikna med dei aller største prosjekta i regionen, som til dømes Rogfast og den nye Seljestadtunnelen, er Gul stripe»-prosjektet eit tiltak som krev eit relativt lite statleg bidrag for betre trafikktryggleiken på den ulykkesutsette strekninga.
— Vil du bli overraska om Vegvesenet ikkje gjer vedtak om å binde midlar til Gul stripe»-prosjektet i år?
— Ja, då blir eg veldig overraska, seier ho.
Annonse
Fredag møter Etne-ordføraren både toppleiinga i Statens Vegvesen, statssekretær Tom Kalsås (Ap), leiar av Transportkomiteen på Stortinget, Sigbjørn Gjelsvik (Sp) når den årlege vegkonferansen i regi av Haugaland Vekst går av stabelen i Tysvær kulturhus i Aksdal.
Det vil truleg både E134 Bakka-Solheim og Gul stripe»-prosjektet bli drøfta.
Ekrheim lova i Grannar tysdag at ho vil halde med å trykke på repeat»-knappen fram til Bakka-Solheim er på plass.
