Gründerlivet: Mot, læring og endring

– Det å kunne skape sin eigen arbeidsplass har vore veldig givande og bra for meg. Eg liker å ha litt kontroll over mi eiga tid, og då passar det veldig godt, seier Haugen.

Ho starta klinikken for ti år sidan, etter fleire år i ulike yrke – som sjukepleiar, lærar, butikkdrivar og til slutt student igjen. Ved Senzie Akademiet i Drammen tok ho vidareutdanning i dermatologi.

– Eg fann ut at om eg skulle drive min eigen hudklinikk, måtte eg berre hoppe i det, seier Haugen.

Ho starta ein blogg, slik at folk kunne sjå kva ho heldt på med, og starta å ta inn kundar ho fekk øvd seg på.

– Det var veldig skummelt, men veldig lærerikt, fortel ho.

Sidan den gong har Etne hudhelseklinikk fått eit trufast kundefølge frå både Etne, Vindafjord, Suldal, Odda og Haugesund.

– Det har gått veldig bra. Eg har mange faste kundar som kjem til meg, seier ho og legg til:

– Eg er veldig takknemlig for at eg har hatt moglegheita til å gjere dette, og for at eg har hatt nok kundar til at eg kan drive.

Blei for mykje

Sjølv om bedrifta hennar går godt, har ho kjent på at det har blitt litt for mykje for henne. Samstundes som ho driv hudpleieklinikken, har ho og mannen ein gard med mykje grisar, der ho er med og tar imot grisungar kvar sjuande veke. Ho har òg ansvaret for rekneskapen for både klinikken og delvis for garden. I tillegg har ho ei mor og fire barnebarn som ho stiller opp for når ho kan.

– Eg har hatt ei kjensle av å ikkje strekke heilt til på alle felt, seier Haugen ope, og legg til at det sikkert er fleire kvinner som kan kjenne seg igjen i det såkalla flink-pike-syndromet.

– Viss du ikkje klarar å ta vare på deg sjølv, klarar du heller ikkje å ta vare på dei rundt deg. Ein må stoppe litt opp å velge ting som betyr noko for deg, få tid til deg sjølv og dei tinga du vil gjere, og ikkje berre det andre ønskjer. Dette har jeg jo sagt til kundane mine, men jeg har ikke akkurat følgt det sjølv.

Ho fekk også påvist lågt stoffskifte, og måtte gjere endringar i kvardagen.

– Når du har eit enkeltpersonføretak, kjenner du eit visst ansvar. Du kan jo ikkje bli sjukemeldt, du må jo på ein måte stå på, for ein har forpliktelsar i forhold til det.

Men på eit tidspunkt må ho stoppe opp og spørje seg sjølv: kva må eg gjere for å ha det bra og kunne halde fram med det eg elskar?

– Eg trur at veldig mange som har små enkeltpersonføretak kan komme til eit punkt der ein kjenner litt på det samme som eg har kjent, seier ho.

Løysinga hennar blei å ta grep.

Ho gjekk ned til tre arbeidsdagar i veka. Ho tok også bort timebooking på nett for å ha betre kontroll på arbeidstida si.

No planlegg ho sjølv, har kortare dagar og kundane meir samla.

Haugen fortel at grepa har fungert bra, og at det har gitt henne ein heilt annan ro.

– Det gjekk betre enn eg trudde. Eg tenkte at folk ikkje ville komme om eg ikkje var tilgjengeleg heile tida, men det har gått fint. Folk vil komme. Sjølv om eg ikkje har så mange kundar som eg hadde ein periode, er det greitt også, seier ho.

Nye impulsar og ny retning

Etter å ha snudd ein litt tung periode til ny energi, er Haugen no klar for neste steg i utviklinga av klinikken.

– Eg har lyst til å hjelpe folk på ein litt annan måte enn før. Eg kom over noko som heiter hypnoterapi. Det høyrdest kanskje litt svevande ut, men då eg leste om det og såg at dei hadde deltidsutdanning i Oslo, kjente eg at det høyrdes spennande ut, seier Haugen, som for tida er i ein utdanningsprosess i hypnoterapi.

Det handlar ikkje om å bli hypnotisert slik ein ser på TV, men om å endre gamle tankemønster og vanar – om å jobbe med seg sjølv på ein positiv måte, forklarar Haugen.

Det er ikkje mange i området som driv med dette. Haugen er no i startfasen og er såvidt i gong med å ta i mot kundar som vil prøve hypnoterapi.

– Det er som då eg starta med klinikken. Når eg har bestemt meg for noko, då må eg berre hoppe i det og gjere det, sjølv om det på ein måte er litt skummelt.

Ho forstår at fleire kan synast at det høyrast litt mystisk ut med hypnoterapi, men seier det er ein form for kognitiv åtferdsterapi.

Ho fortel engasjert om korleis behandlinga føregår.

Den som får behandlinga ligg avslappa på benken medan ho les opp ein tekst som påverkar det ubevisste sinnet på ein positiv måte. Behandlinga kan kombinerast med lett banking på energipunkt i kroppen. Målet er å endra gamle tankemønster og finne meir ro og balanse.

Håpar å inspirere andre

Haugen fortel at det kan hjelpe folk som kjenner på blant anne stress, dårleg sjølvbilete eller eit høgt forventningspress.

– Ein må vere motivert for behandlinga og for å gjere ein innsats sjølv. For ein får nokre enkle heimelekser. Dei er nyttige og gode verktøy å bruke i kvardagen, seier ho.

Sjølv om ho no går i gang med eit nytt tilbod, skal ho framleis halde fram med hudbehandlingar, IPL-lysbehandlingar, medisinske behandlingar og sal av produkt – men noko blir det no slutt på.

– Eg har tatt bryn, vipper, vippeløft og voksing. Det er ting som vil bli fasa ut, seier ho.

Det kjennes rett for henne å satse på noko nytt.

– Det har gitt meg motivasjon og energi. Når ein har jobba ein plass i ti år, treng ein litt nye utfordringar.

Nina Kristin Haugen er eit eksempel på korleis små bedrifter kan utvikle seg, også i krevande periodar. Ho oppfordrar andre som driv åleine til å ta grep for eigen trivsel og helse.

– Når eg klarar det, klarar andre det også, for eg er ikkje noko supermenneske. Eg er ein heilt vanleg person. Ein treng ikkje vere verdensmeister. Ein kan klare å gjere det om ein berre finn tilbake til seg sjølv.

Haugen er open på at vegen ikkje alltid har vore lett, men ho håpar historia hennar kan inspirere andre.

– Eg er veldig stolt over å kunne skape min eigen arbeidsplass. Det er ikkje berre dei store bedriftane som tilfører fellesskapet noko. Hvis det er noko du kjenner du har veldig lyst til, så ikkje høyr på dei stemmene som seier at du ikkje kan det. Prøv å ver litt modig, og berre gjer det, avsluttar ho.