Grønt lys for miljøgater og tunnel
Tryggare ferdsel, nedsett fartsgrense og estetisk utforming er blant ingrediensane som skal bakast inn i dei nye miljøgatene i Sandeid og Vikedal som etter planen skal stå ferdig innan fire års tid.
Miljøgate gjennom Sandeid og Vikedal, tunnel som alternativ på vegen mellom Sandeid og Vikedal og tunnelprosjekt i Skipavåg var nokre av dei lokale prosjekta som blei skissert under informasjonsmøtet om framtidige vegprosjekt på vegstrekninga mellom Sandeid og Sauda sist onsdag.
Over 120 personar hadde tatt turen til bygdehuset i Vikedal for å høyra Elisabeth M. Danielsen frå plan- og forvaltningsseksjonen i Statens vegvesen avdeling Haugesund orientera om prosjekta som fylkeskommunen har sett av midlar til dei komande fire til fem åra. Rogaland fylkeskommune har ansvar for rundt 80 prosent av vegnettet i fylket og nå vil dei prioritera vegstrekninga på Fv. 46 og Fv. 520 frå Sandeid til Sauda. 29 millionar av midlane er øyremerka miljøgate i Sandeid som etter planen kan få oppstart i 2021/22, medan miljøgata i Vikedal er like om hjørna.
— Miljøgata i Sandeid vil få tilsvarande løysingar som miljøgata i Vikedal. Her kjem to-sidig fortau, sikker kryssing av vegen, gatelys, kantstopp, oppstramming av kryss og avkøyrslar og beplanting. Fartsgrensa blir sett ned til 40 km/t og det vil bli eit køyresystem som er trygt for alle, sa Elisabeth Danielsen under presentasjonen i bygdehuset.
