Grev fram spor frå jernalderen

Sist måndag starta Arkeologisk museum ved Universitetet i Stavanger utgravingar like ved Ølen sentrum. Eit 5 mål stort område på Eide Aust sentrumsområde i Ølen skal under lupa og undersøkjast for spor etter fortida med tanke på mogeleg ny idrettshall. Det er ikkje bestemt når eller kven som skal byggja hallen.

Til saman seks arkeologar tilknytt Universitetet i Stavanger har fem veker på seg til å avdekka kva som skjuler seg under grasbøen. Etter ei veke med grovarbeid har dei rydda om lag halve området for fersk matjord. Resultatet så langt er svært lovande.

— Her har me funne mykje. Dette er eit spennande felt. Bevaringsforholda er gode og det er godt bevarte strukturar her, seier arkeolog og prosjektleiar Oliver Sørskog frå Arkeologisk museum.