Golffeber i Etne
No treng du ikkje lenger enn til kjellaren på Skakkesentert for å ta deg eit slag golf. Fredag blei det opna opp for bruk av ein splitter ny golfsimulator i Etne som vil vere tilgjengeleg for alle.
Fredag var det opning av den nye golfsimulatoren, og rundt 20 personar tok turen innom. Allereie er fleire bookingar på plass.
Simulatoren er av typen Trackman, som blir rekna som noko av det beste på marknaden. Den registrerer både treff, spinn og retning på ballen, og gir ei oppleving som liknar mykje på spel ute på bane.
Annonse
– Me ville laga eit lågterskeltilbod, der ein ikkje treng eige utstyr eller erfaring for å delta, seier Leif Vestbø.
Det var han saman med Stian Aasheim som kom på idéen om å kunne ha eit golftilbod lokalt i Etne. Dei, saman med fleire andre, har sidan februar jobba med søknadar, budsjettering og å finne lokasjon.
Dei fekk innvilga støtte av Sparebankstiftinga, medan fleire frivillige har bidrege i dugnadsarbeidet med å pusse opp rommet og få på plass sjølve simulatoren. Prislappen landa på omlag ein halv million kroner for heile prosjektet.
– Det er derfor me har bestilt full pakke. Det skal vere så lett som mogleg å ta det i bruk, seier han.
Annonse
Blant dei over 20 frammøtte var Olav Aasheim Gunnarsson, Magnus Haugen og Bjørnar Tungesvik Matre. Dei seier sjølv at dei ikkje har spelt særleg mykje golf før, men er godt nøgd med det nye tilbodet.
– Det er veldig bra, seier Gunnarsson.
– Me kjem til å ta den i bruk, og me har booka time allereie, seier Haugen.
– Målet er ikkje å tene pengar
Prisen for å leige simulatoren er sett til 200 kroner per time. Timeprisen er fast, uavhengig om ein er åleine eller ei gruppe på fire–fem personar. Golfkøller kan ein låne på staden. Initiativtakarane legg òg opp til at det kan arrangerast kurs, konkurransar og teambuilding framover.
– Målet er ikkje å tena pengar, men å skape eit tilbod som fleire kan ha glede av, seier Vestbø.
Annonse
Prisen er satt for å dekke abonnement, vedlikehald og på sikt kunne utvide tilbodet. Initiativtakarane har også planar om å arrangere turneringar.
Allereie på Etnemarknaden fekk folk prøve simulatoren, og responsen har vore enorm.
– Det har blitt tatt godt imot. Det har vore mykje snakk om det. På Etnemarknaden var det over 50 innom. Det var jamn straum heile opningstida, seier Aasheim.
Det er nemleg ikkje verre enn å ta turen innom, trykke på éin enkel raud knapp, og så er det klart til å spele.
Kan ta obligatorisk kurs lokalt
For å spela golf på ekte bane er det krav om å ha fullført kurset Vegen til golf» i regi av Norges Golfforbund (NGF). Vestbø opplyser at dette kan bli mogleg å ta her på sikt.
Annonse
– Då leiger me inn folk. Då viser dei, og du kan ha teori her inne. Så må du ha ein liten time eller to der du spelar på ein bane på slutten (på simulatoren), seier Vestbø.
– Det tenker me at kan auke terskelen for å få fleire medlemmer og få folk til å spele golf. Du treng ikkje å gå ut i den store og skumle verda for å spele golf, det kan gjerast her, legg Vestbø til.
