God stemning og treffande replikkar
Vikedal grendeutval har starta middagstreff for pensjonistar i bygda, og erfaringane er gode frå dei to treffa dei har hatt. — Me går inn for å få dette til éin gong i månaden, fortel Kari Frøland Mo.
Då leiar Kari Frøland Mo og Berge Kjell Opsal i grendeutvalet for første gong inviterte til middag og kos for den eldre garde på Vikedal Kro, kom det så mange at det nesten blei vanskeleg å huse alle saman: over 60 stykk. Dette var tidlegare i oktober. Neste gong, tysdag denne veka, kom vel 40 pensjonistar for å ete tidleg laksemiddag i halv-eitt-tida og deretter høyre på føredrag om trening, kropp og helse frå fysioterapeutar i Vindafjord kommune, Caroline Holmedal og Inga Elisa Eide.
Begge deler blei sett godt pris på av dei frammøtte. Jamt over er pensjonistane i Vikedal ein relativt ung og sprek gjeng, observerer dei i grendeutvalet, og mange treng kanskje berre eit godt treningstips eller tre for å klare seg særs godt som heimebuande.
— Me tilbyr å køyre dei til desse middagstreffa, men det er ikkje så mange som har behovet. Dei fleste køyrer bil sjølv, fortel Kari Frøland Mo.
