God start på julesesongen
Laurdag var det opning av jul i Drivhuset i Etne. Både utstillarar og dei som tok turen, var godt fornøgde med dagen.
— Dagen blei akkurat slik me ønskte det. Folk kosar seg, seier Yvonne Sandgren, som er blant arrangørane på Drivhuset.
Litt av alt
Annonse
Opninga baud på alt frå lokalproduserte varer og kafé til aktivitetar for barn. I tillegg vart det boklansering av Jan Terje Rafdal si nye bok Kattenes Kriminalprotokoll – Andet Bind, og markering av tiårsjubileet til Yvonne Sandgren sin klesbutikk Prikkar.
— Me feirar litt av alt i dag: ti år for meg, boka til Jan Terje og juleopning, fortel Sandgren.
Ein annan av arrangørane, Debby Fosse, var også godt nøgd.
— Dette har vore ein veldig fin dag med mykje folk, seier ho.
Annonse
Møteplass
Blant utstillarane var Elin Thorsen og Dag Monsen, som selde fint brukte juleservise og julepynt.
— Det har vore veldig triveleg, og me har hatt godt sal, seier Thorsen med eit smil.
I hobbyverkstaden til Kåre Rafdal fekk barna utfolde seg med maling og kreativitet.
— Barna har halde på mykje sjølve, eg har berre vist litt. Nokre er veldig flinke, og somme brukar litt mykje maling, men det er imponerande, fortel han.
Ein av dei unge deltakarane var Alf Foss Alsvik, som hadde full konsentrasjon om oppgåva.
Annonse
— Eg malar ein nisse. Det er kjekt, fortel han.
Også dei som tok turen innom, sette pris på arrangementet og atmosfæren.
— Drivhuset er eit kjempefint tilbod som det er kjekt å stikke innom av og til. Det er også ein fin plass å ta med gjester når me har besøk, seier Elin Sørheim.
