Gler seg til å ta fatt

Selsvold kjem frå stillinga som sokneprest i Husnes og Holmedal sokn i Kvinnherad. Ho seier at dei tilsette og vikarprest Sigfred Sørensen har gjort ein god jobb i åra utan fast prest i Ølen og Bjoa.

— Eg ser inga grunn til å finna opp krutet på nytt, men alle er me ulike og det kan vera noko eg ynskjer å gjera meir på min måte, seier ho.

Ho skiftar no både prosti og bispedømme, men miljøet er ikkje større enn at ho kjenner fleire ho no skal samarbeida med. Dessutan har ho vore i same prosti som Kari Vik Stuhaug i Etne.

Imponert

Åse Selsvold er imponert over dugnadsarbeidet som er gjort med oppussinga av kyrkja i Ølen.

— Det er fantastisk å sjå korleis kyrkjelyden har delteke. Det har vore omfattande arbeid, ikkje minst med flyttinga av preikestolen som gjorde at det blei eit opnare miljø, seier den nye soknepresten.

Ho har høyrt om den årlege vårdugnaden, og seier at slikt ikkje er ein selvfølge og at nettopp derfor inspirerer henne.

— Det er tydelegvis gode krefter i begge kyrkjelydane, med folk som vil noko, seier ho.

Ho gler seg til å ha den første gudstenesta i Bjoa denne søndagen.

Reiseveg

Åse Selsvold er frå Bømlo, og forutan Brandøy misjons- og konferansesenter har ho ikkje hatt spesielle band til Ølen og Bjoa tidlegare.

— Eg og dottera mi tok ein køyretur i sommar for å bli betre kjend. Me likte det me såg, men me blir buande på Bremnes sidan ho har to år att på ungdomsskulen som me bur i kort gåavstand frå på Bremnes, seier Selsvold, som òg har ein son på 28 år.

Når det gjeld køyring frå Bømlo er ho glad for at det er ferjefritt.

— I åra mine i Kvinnherad var det mykje ferjeventing. Om det er litt køyreveg til Ølen og Bjoa, så er det jo ingenting i forhold til i gamle dagar då prestesetet var på Fjelberg og skyssen var i robåt, avsluttar den blide presten.