Glad for å visa fram kortreist mat
Mange små lokalmatleverandørar opplever det som krevjande å få ein fot innanfor dørstokken på store daglegvarekjedar. For ikkje å snakka om produkt i kjøledisken. Lokalmatveka er derfor svært viktig, meiner osteprodusent Jens Sævareid.
Side om side i daglegvarebutikken Extra i Etne sto det til saman elleve lokalmatleverandørar frå både Hordaland og Rogaland i førre veke. Frå Grannar-distriktet var Johs. Lundal frå Åkrafjorden, Jens Sævareid frå Skjold gard i Stordalen og Skakkelaks frå Sørstranda representert. Alle tre med sine lokale produkt.
Jens Sævareid har dei siste sju åra drive med geiter og ysting av geitost, og mange fekk seg både éin og to smaksprøvar av den ferske osten frå Skjold gard.
— Eg har smakt mykje geitost i mitt liv, men denne var verkeleg rundt og fin i smaken. Den må vera ganske feit? seier butikkunde Torill Skrede.
