Kongebesøket
Gav dronninga handlenett i gåve
Elevbedrifta Reuse ved Lundeneset vidaregåande skule var blant bedriftene i Vindafjord kommune som fekk helsa på kongen og dronninga. Som takk for besøket fekk dronninga eit handlenett i gåve.
— Me fekk vist fram handlenetta våre. Dei er hundre prosent bærekraftige og dei fekk med seg eit nett med flagget på. Nettet var laga spesielt til dei, seier Leah Knudsen (17), Vilde Heimdal Jakobsen (17), Serina Victoria Ådnanes (17), Ester Fosse (18) og Martine Øvrelid (18) ved elevbedrifta Reuse på Lundeneset.
Å få kongen og dronninga på besøk på bedriftsstanden i Ølen var ei stor oppleving, og dei unge bedriftseigarane var svært stolt over å ha fått ein prat med dei kongelege.
Annonse
— Dei var veldig koselege og det var veldig stas å få helsa på dei. Dei stilte mange spørsmål, seier dei unge damene.
Utvalde bedrifter
Til saman fem bedrifter var representert under kongebesøket i Vindafjord. Arriva Shipping AS, FAVO/infoskjermen, hanskeprodusenten Granberg AS, Vindafjordbonden og Reuse var plukka ut til å representera set rikhaldige næringslivet i kommunen, og etter at det offisielle programmet var over la kongen og dronninga turen innom dei ulike standane for få ein kort prat med eigarar og representantar frå bedriftene.
— Eg fekk fortalt om bedrifta der eg har jobba i over 40 år, og alt me har utvikla sjølv. Kongen var interessert i å høyra og dronninga spurde kor mange typar me har i sortimentet. Då eg fortalde at me hadde over 200 typar blei dei forundra, seier Ole Marthin Granberg som samen med sonen Mathias Granberg stilte opp for familiebedrifta frå Bjoa.
Annonse
Vindafjordbonden
Landbrukskommunen Vindafjord var representert ved Vindafjordbonden. Hans Majestet høyrde interessert etter då representantar frå interesse-organisasjonen i Vindafjord fortalde om landbruket i kommunen.
— Det var veldig kjekt å få møta Kongen, og ei ære å få bli vist fram, seier Inga Steinsland.
Bedriftsbesøket var siste post på programmet før Kong Harald og dronning Sonja steig inn i sin staselege Audi A8 for å bli frakta ned til kongeskipet. Vinkande og med handlenettet frå Lundeneset i hand vinka dei to farvel til store og små som hadde møtt opp ved Sjøperlo for å få eit blikk av dei kongelege gjestene.
