Gardistane overraska alle då dei takka for maten

Hans Majestet Kongens Gardes 3. gardekompani er på turné, og i anledning kongeparets besøk i Vindafjord torsdag var det mange som tok turen til SR-Bank Stadion i Ølen for å få med seg deira oppvising der.

Overrasking

Vindafjord kommune var vertskap og sytte også for at gardistane fekk seg middag. I kulturhuset fekk dei servert lasagne og kongebollar, og då dei skulle takke for maten kom ei overrasking arrangøren ikkje var budd på.

Les alt om kongebesøket her: Kongebesøket

— Plutseleg reiste alle seg opp. Ungdommane var jo så flotte i uniformene sine, så eg ville berre ta eit bilde. Så sa eit befal at eg berre måtte filme også, fortel Ingebjørg Rullestad Gjerde som er kommunalsjef organisasjon i Vindafjord kommune.

Gardistane viste at dei kan meir enn å spele musikk og gå i takt, då dei byrja å synge Bruremarsj frå Lødingen», ein tradisjonell marsj frå Nordland, og som Halvdan Sivertsen har satt tekst til.

— Hyggelege og kjekke

Gjerde skryt veldig av dei unge gardistane.

— Det var veldig høflege og kjekke ungdommar, og dei kunne fortelje at det var den beste middagen dei hadde fått på heile turnéen sin, fortel ho.

Det var tilsette ved kommunikasjon og service i Vindafjord kommune som hadde organisert og rigga til middagen saman med tilsette ved Ølen Kulturhus.