Fullt hus for jubilanten

Tysdag kveld var det ikkje lett å finna ledig stol i idrettshallen i Skjold. Over 700 stolar var sette ut, og i tillegg blei galleriet opna for bygdefolk som ville ta del i feiringa. Resultatet blei eit fullsett lokale med foreldre, søsken, besteforeldre og naboar som fekk oppleva ein jubileumskveld utanom det vanlege.

— Dette er først og fremst ein fest for elevane og foreldra, men me har også opna dørene for bygda, fortel inspektør på Skjold skule, Kari Synnøve Velde Haugen.

Fem tiår på scenen

Framsyninga var sett saman som ei reise gjennom dei fem tiåra skulen har eksistert. Kvart trinn hadde fått eit tiår å fordjupa seg i, og resultatet blei eit mangfald av uttrykk – frå nostalgiske skulesongar til moderne pophits.

Førsteklassingane mjuka opp stemninga med den velkjende Da klokka klang, mens fjerdeklasse både song og spelte Mary had a little lamb på blokkfløyte. Publikum nikka gjenkjennande – og lo – då mange kjende seg igjen i minner frå si eiga skuletid med obligatorisk blokkfløyte.

Vidare følgde dansenummer, historiske innslag og musikalske høgdepunkt: Grease Lightning frå musikalen Grease, A-ha sin klassikar Take on me, Whitney Houston sin I wanna dance with somebody, og ikkje minst gjenforteljingar av store hendingar frå 1980-talet, 1990-talet, 2000-talet og pandemitida. Ein klasse hadde til og med laga parodi på pressekonferansane under koronaen, komplett med kohortar, munnbind og Høie sitt legendariske karateslag» for å hindra handhelsing mellom Camilla Stoltenberg frå Folkehelseinstituttet og statsminister Erna Solberg.

Tidspilotar i spissen

Gjennom heile kvelden hadde publikum følgje av tidspilotane» Lars Martin Velde (klasse 8B) og Tordis Sørhus (klasse 10A). Dei var programleiarar for første gong, men leverte med tydeleg røyst, god humor og ein tryggleik som imponerte både publikum og lærarar.

— Me skulle binde framsyninga saman og presentera dei ulike innslaga. Me gler oss veldig, og trur det blir kjekt, sa ungdommane før førestillinga starta.

Publikum kvitterte med applaus, latter og gode tilbakemeldingar.

Ordførar med blokkfløyteminne

Blant gjestene i salen var også ordførar Ole Johan Vierdal. Han helsa til jubilanten og delte personlege minne frå eiga skuletid.

— Eg hugsar denne tidsperioden som det var i går. Og eg er kjempeimponert over alle dykk som har stått på scenen i kveld. De er mykje flinkare enn me var, sa han frå scena.

Vierdal fortalde også om korleis ein kamerat prøvde å sleppa unna blokkfløytespel ved å gløyma» enten heile – eller halve blokkfløyta når dei skulle øva på skulen. Publikum lo godt av historiene.

Skulen si historie

Vierdal kunne også dra publikum gjennom litt historieforteljing. Han sa at Skjold skule blei bygd i 1975 som ein del av ei stor satsing i gamle Vindafjord kommune. Den gong blei det reist fire nye skular – i Skjold, Vats, Sandeid og Vikebygd. Skjold fekk først barneskule, før ungdomsskulen stod ferdig i 1980.

I dag har skulen 330 elevar fordelt på tretten klassar. At alle fekk stå på scena under jubileumsfeiringa, gjorde arrangementet til noko heilt spesielt.

Ein kveld å minnast

Stemninga i idrettshallen var høgtideleg, men også full av latter, song og applaus. Foreldre og besteforeldre filma og tok bilete, mens elevane viste fram eit breitt spekter av talent – frå song og dans til humor og historiske framstillingar.

Kvelden kulminerte med ei oppmoding frå rektor, om at foreldre, søsken, og bygdefolk i salen skulle reisa seg og synga bursdagssongen for elevar og lærarar i Skjold.

Som sagt – så gjort. Bursdagssongen og den påfølgjande applausen etterpå, blei ei flott punktum for ein minnerik kveld.