Full fart og deltakarrekord under årets Bjoa Halvmaraton

Det er laurdag føremiddag og klart for Bjoa Halvmaraton. På idrettsbanen yrer det av liv og små og store som kosar seg i seinsommarsola. Årets halvmaraton er nummer fem i rekkja og aldri før har arrangøren Bjoa Idrettslag hatt så mange namn på deltakarlista. Løpet er delt inn i to distansar, halvmaraton og ei kortare løype på ti kilometer, og begge klassane med til saman 132 løparar stiller til start samstundes. Løpstart er sett til klokka elleve og medan dei ivrigaste tek seg ein oppvarmingsrunde eller to på idrettsbanen nyttar andre tida til å slappa av før startskotet går.

Deltakarane varierte i alder, frå heilt unge til godt vaksne på over 60 år. Blant dei yngste deltakarane er søskenparet Celina (10) og Olav (8) Vegner frå Haugesund, Dei stilte til start i flunkande nye jobbesko med sitt eige namn på, og la bak seg ti kilometer på litt over ein time. For dei fleste er dette ei strålande tid, men for 8 år gamle Vegner var tida 1.o5 litt skuffande.

— Eg kunne sprunge litt fortare. Eg sprang fortare i fjor. Eg likte ikkje oppoverbakkane, seier Olav etter at målstreken er passert.

Søstera Celina er meir nøgd med eigen innsats og syntest det var heilt topp at deler av løypa gjekk gjennom skogen.

Raskast i herreklassen

Dei raskaste tidene på halvmaraton-distansen stod ein sprek haugesundar for. For andre år på rad tok Henrik Lindtner frå Haugesund gull og sprang i mål på tida 1.15.56. Luke Cambridge frå Haugesund sprang inn til sølv, medan Alan Hovda frå Sveio sikra seg tredjeplassen. Dei tre medaljevinnarane var godt nøgd med eigen innsats, og minst like nøgd med arrangementet.

— Dette er eit kjempeopplegg. Alt er godt tilrettelagt, seier dei tre karane og skryt av løypa som går gjennom vakker Bjoa-natur.

— Me likar løypa. Den er veldig naturskjønn, seier dei.

Ny rekord

Alle som deltok på løpet fekk medalje, og til dei beste i kvar klasse vanka det både premie og ein spesiallaga medalje.

— Me har ein spesiallaga medalje som me har designa sjølv, seier Anne Gunhilde Oma i Bjoa Idrettslag og viser fram den spesialdesigna medaljen med Bjoa Halvmaraton trykt i midten.

I tillegg medaljar for alle deltakarane hadde arrangøren ein ekstra premie på lur for dei som slo tidlegare rekordar i dame-og herreklassen. I klassen for menn blei den gamle bestetida ståande, men i dameklassen blei det ny rekord. Det sytte Helena Hope frå Haugesund for. Ho slo den tidlegare rekorden med 17 sekund og gjekk i mål på tida 1.23.59.

— Eg var med for to år sidan og målet var å slå meg sjølv. Det gjekk bra, seier vinnaren av dameklassen nøgd.

Barneløp

Løpsdag på Bjoa er eit familiearrangement der også dei yngste får høve til å delta. Barneløpet samla i år 28 barn og unge, der dei fleste sprang ein runde rundt på idrettsbanen. Andre la bak seg to rundar, medan dei ivrigaste deltok i begge løpa.

— Eg sprang begge løp. Det gjekk fint, seier 9 år gamle Alex Waszkiewicl frå Bjoa som var med på løpet for første gong.

— Eg spelar mest fotball og handball, seier han.

Aukande interesse

Ideen bak løpsarrangementet på Bjoa dukka opp i koronatida då ein liten gjeng bjoabuar hadde meldt seg på maratonløp i Bergen. Men då arrangementet blei avlyst grunna pandemien måtte dei finna andre løysingar. Det blei starten på løpseventyret på Bjoa.

— Dei sprang på Bjoa, og så utfordra dei idrettslaget til å starta løp, fortel Anne Gunhilde Oma.

Interessa for løpet har auka jamt og trutt med åra, og tok eit skikkeleg hopp dette året.

— I fjor hadde me rundt 90 deltakarar. I år er rekord. Deltakarane kjem frå Haugesund og omland, i tillegg til lokale, seier ho.

Komiteen til årets arrangement består av åtte medlemmer av idrettslaget. Dei har tatt seg av planlegging og organisering. I tillegg stiller dugnadsvillige bygdefolk opp for å få hjula til å gå rundt.

— Me har rundt 30 dugnadsfolk. Folk er kjempeflinke til å stilla og det er veldig lett å få tak i folk, seier ho.

Hovudsponsor er bjoabuen Nils Reimers sitt selskap NRB.

.