Frå datainteresse – til milliardkonsern

Sigmund Lunde starta yrkeskarrieren som snikkar, før han gjekk vidare på ingeniørhøgskulen innan bygg og anlegg. Så studerte han petroleum. Broren Tor Erling var maskiningeniør, og dei begge var tilsette ved Haugesund Mekaniske Verkstad, sjølv om dei ikkje jobba direkte i lag. Dei var i ulike fagområde, og dreiv i praksis med kvar sine ting, og det var heilt tilfeldig at dei begge sa opp jobbane sine omtrent samtidig i 1986.

Det var interessa for data som snudde retning for Sigmund. Han begynte å bruka datamaskinar på jobb, og oppdaga at dette var mykje meir interessant enn den yrkesvegen han hadde valt.

— Me hadde jo begynt å bruka datamaskinar i jobben, og eg fatta stor interesse for det, seier Sigmund Lunde.

Han og broren starta i det små. Først med levering av konsulenttenester, datautstyr, PC-ar og standard programvare. Det var knallhardt, og det var ingen økonomisk gevinst i det heile tatt. Dei jobba gjennom døgeret, og fekk brynt stå-på-viljen sin. Mellom 1986 og 1991 bygde dei opp det dei kalla Futura Datacenter. Det var starten, sjølv om Omega-namnet førebels ikkje var etablert i den form ein kjenner det i dag.

Gjennombrotet i 1991

I 1991 fann dei ei ny retning, og bytta namn til Omega. Dei gjekk inn i oljeindustrien og starta med å levera til store prosjekt. Dette var ein heilt annan økonomi og ein heilt annan logikk enn å selja PC-utstyr og småsystem.

— Alt handla berre om å levera varene, og så sant me gjorde det var det også betalingsvilje. Det var også kvaliteten i leveransane som gjorde heile forskjellen, seier Lunde.

I 1994 fekk Omega rammeavtale med Statoil, og denne kontrakten blei starten på det som seinare er blitt Omega sin viktigaste softwarehistorie, med PIMS og system for kostkontroll, planlegging og prosjektstøtte.

Sigmund hugsar at dei eigentleg var altfor små.

— Eg hugsar han som var kontakten vår i Statoil sa at dei måtte ta det opp hos juridisk avdeling. Dei syntest det var litt merkeleg at dei skulle gjera seg avhengige av ein så liten leverandør oppe i vesle Ølen, seier han

Men Omega fekk kontrakten! Og frå den dagen har dei hatt kontinuerlege leveransar inn i store prosjekt.

Vekst med år og erfaring

Sigmund seier dei brukte 15 år på å koma opp til hundre tilsette, men etter kvart kunne dei stiga med hundre i året. Dei bygde opp struktur etter kvart som det blei nødvendig, og gründeren kan fortelja at dei har vore heldige med å ha flinke folk med seg heile vegen.

Han trekker mellom anna fram kor viktig Petter Aalvik har vore som konsernsjef. Sigmund kjende han frå han var ungdom på vidaregåande i Ølen. Han hadde reist ut, jobba internasjonalt og utdanna seg vidare. Tidleg på 2000-talet kom Aalvik inn, først som styreformann – og seinare som konsernsjef.

— Han har vore sentral i å byggja struktur og organisatorisk grunnmur, seier Sigmund som i dag er styreleiar.

Han fortel at fram til Aalvik kom var mykje basert på tillit. Dei brydde seg ikkje om kva som stod i kontraktane, og hadde jobba lenge med Statoil utan å ha dette på plass. Aalvik tok tak i dette, og fekk rydda i rekkene.

— Det har vore styrken gjennom heile utviklinga: kombinasjon av kultur, tillit, robuste menneske og fagleg tyngde, seier Lunde.

Advantage – satsing på folk

Dei investerer først og fremst i folk, fordi det nettopp er folk» som er kapitalen i Omega.

— Eg tenker at det er millionar av kroner som forsvinn dersom ein person med viktig kompetanse forsvinn ut døra, seier han og legg til at den viktigaste jobben dei har er å halda på folket som jobbar i Omega.

Derfor blei også Advantage-programmet» bygd opp. Dette er ei ordning for dei tilsette, der dei samlar poeng kvar månad og kan nytta desse poenga til gratis lån av hytter, feriebustader, turar, konsertar, opplevingar, treningspoeng og aktivitetar. Ordninga er tilgjengeleg for alle, og det er eit profesjonelt styrt system som fungerer utmerka.

— Det er viktig for å halda på kompetansen, utvikla kultur og for å gjera arbeidsmiljøet robust, seier han.

År med krise

I 2014, 2015 og 2016 gjekk det nedover med økonomien for Omega. Oljenedturen trefte hardt.

— Me begynte å tapa alvorleg mykje pengar kvar einaste månad. Då var me ganske redde, men då eg såg på rekka av tilsette som stod på for å komma igjennom nedturen var eg overtydd om at dette skulle gå bra. Det vi vera mange selskap som går dukken for oss, fortel Lunde at han tenkte.

Men Omega stod ikkje stille. Mange av ingeniørane blei flytta frå olje og gass, og over til prosjekt som jernbaneutbygging, sjukehusbygging og Nasjonalmuseet. Slik flytta dei også kompetansen inn i nye marknader.

Dette gav Omega fleire bein å stå på. I seinare år har dei også fått innpass innan infrastruktur, vindkraft, batterifabrikkar og store offentlege prosjekt.

Den neste epoken

Sigmund Lunde seier at dei neste 40 åra ikkje blir dei same som dei første 40.

— Dette med AI er jo litt skummelt. Me veit ikkje korleis landskapet ser ut om berre ti år.

Omega er allereie inne i store teknologiprosjekt knytt til datasenter globalt, og me har nå landa ein stor kontrakt med Microsoft. Det er ganske spesielt, for me har alltid brukt Microsoft sin teknologi. Når dei no brukar løysingane våre når dei bygger datasenter, er det som om ringane er slutta, seier han.

Hovudkontoret i Ølensvåg er framleis kjernen. Sigmund sit sjølv i ope landskap og uttrykker klinkande klart at det er viktig.

— Eg synest det er viktig at ein ikkje stenger seg inn i store direktørkontor. Det gir innovasjon og trivsel å sitte i landskap, seier han.

Omega ønskjer at folk skal vera på kontoret. Det byggjer kultur og fellesskap, og Lunde sjølv meiner det etter kvart kan bli ein konkurransefordel, i ei tid der mange selskap har meir heimekontor enn fysisk fellesskap.

Omsetning og resultat

Sigmund Lunde kan opplysa at Omega no ligg på om lag fire milliardar kroner i årleg omsetning. Han seier at dette har kome gradvis, og ikkje gjennom store økonomiske hopp. Utviklinga har vore jamn, forsiktig og stabil, og han understrekar at Omega aldri har jaga store marginar eller eksplosiv avkastning.

— Me har nok lege på fire-fem prosent i resultatmargin, seier han, og legg til at dei ikkje ønskjer å risiker arbeidsplassar ved å jaga spekulativ vekst. Han meiner det er betre å byggja trygg økonomi og soliditet i botnen, framfor å ta store sjansar.

— Det er også grunnen til at Omega kom gjennom nedgangstidene i oljeindustrien utan å bli slått ut. Det er folk me er bygde på. Då må me ha økonomien til å ta vare på dei, seier han.

I 2020 endra Omega merkenamnet sitt til Omega 365, og per i dag har dei 2.300 tilsette spreidd over heile verda, med hovudkontor i Ølensvåg.