Fornying gjer butikkvardagen betre

— Det er kjekt med fornying. Lokala ser fine ut, og det blir lettare å jobba i butikken, seier Torbjørn Sande.

Totalt er dei tolv tilsette i butikken, som held til i same bygg som Coop Extra.

Lettare å finne fram

Nyopninga blir feira til og med laurdag. Allereie onsdag var det førehandsopning for medlemmar i Felleskjøpet Rogaland-Agder, der 70–80 personar tok turen. Under førehandsopninga var det demodag på John Deere 6M saman med André Tjeltveit, og folk blei oppmoda til å ta med sin eigen traktor. Det var kåring av publikums favoritttraktor og Etne sin finaste traktor.

Butikksjef Jon Oddvin Moe fortel at det var god stemning på førehandsopninga. Han seier at oppussinga av lokala har vore omfattande.

— Alt er flytta på, som ei stor ommøblering. Det tok to og ei halv veke med lange dagar. Me hadde med stab frå hovudkontoret i Stavanger og eigne lokale folk, opplyser Moe.

Han forklarer at kasseløysinga er flytta lenger inn i lokalet, og at det no står eit nytt drivhus på utsida av butikken. I tillegg er det sett inn ein ny reol i hentedelen for å gjere varehenting meir effektivt. Torsdag var han godt fornøgd med resultatet etter ein hektisk, men god prosess.

— No er det meir effektivt og oversiktleg for dei tilsette. Me får plass til fleire varer og slepp å springa fram og tilbake for å henta ting, fortel butikksjefen.

Åse Rødne, som har jobba i butikken i over 15 år, er også godt fornøgd. Ho seier at den nye oppsetjinga gjer arbeidsdagen lettare, og at kundane finn lettare fram.

God respons

I tillegg til dei positive tilbakemeldingane frå tilsette, fortel Moe at kundane verka fornøgde. Torsdag var ein god dag for butikken med jamn straum av folk frå klokka åtte og utover dagen. Blant dei som tok turen, var Lars Arne Lien.

— Her er det meir oversiktleg enn før, veldig ryddig og greitt, seier han.

Stemninga i lokalet var god, og folk i ulike aldrar var jamt fordelte rundt om i dei store lokala. Arnt Grindheim synest det var kjekt å sjå den nye butikken. Merete Myrstad omtala den som kjempefin.

Pølser og triks

Torsdag blei nyopninga feira med kaker, kaffi, pølser, loddtrekning og tilbod. Dag Eriksen steikte pølsene på ein Lotusgrill, som han viste fram fungerer inne i butikken.

— Å stå her og steike pølser er kjempekjekt, seier han.

Kjellaug Selsaas kom til butikken med hundane Hippie og Nelly. Ho har lang erfaring med å konkurrera i lydnad; blant anna tok ho VM-sølv med Nelly i juli. I Etne viste ho fram nokre triks med hundane.

— Me synest det er kjekt på Bondekompaniet Etne, så eg ville koma på opningsfesten, seier Selsaas.

Ho fortel at Felleskjøpet har vore ein viktig partner for ho. I 2001 skreiv ho ein avtale med Felleskjøpet om fôring med hundematmerket deira Labb, så alle landslagshundane hennar har blitt fora med det.