Førjulskos og nissebesøk på tunet
I strålande novembervêr og med eit par varmande grader i lufta blei årets julemarknad på Nerheimstunet i Ølen ei stemningsfull førjulsstund for både utstillarar og marknadsgjester.
Eit julepynta tun fullt av god gammaldags julestemning ønskte små og store velkomen til gards då Nerheimtunets Venner inviterte til julemarknad. Det gamle tuntreet var pynta med store gavelappar fylt med koselege julehelsingar og over glørne i bålpanna hang kaffikjelen og gløggpanna klar til servering. Den gamle løa på garden tente som kafélokale denne marknadsdagen og rundt på tunet stod salsbodene tett i tett.
— Det er mykje fint å sjå. Dette var veldig koseleg og så var me så heldig med vêret, seier marknadsgjestene Turid Øgland og Anne Gunn Øglend frå Ølen og kosar seg i finvêret.
— Me er her for å handla og for å kikka litt. Me har handla litt julekaker, seier dei.
