Folksamt på kulturkveld i Etne

LESAREN MELDER: Fredag kveld var mykje folk samla til kulturkveld på Enge bedehus. Det var KM-Karane som stod som arrangørar for temaet Feire fortid – forme framtid, og på programmet stod både dikt, song, mat og minibasar. Hovudtema for kvelden var likevel Moster 2024.

Prost Svein Arne Theodorsen sit i hovudkomiteen for 1000 årsfeiringa, og han var invitert for å fortelje om jubileet og kva som skal skje den første helga i juni på Moster. Han fenga tilhøyrarane med eit engasjert kåseri om kva som skjedde på Bømlo for 1000 år sidan og kva dette har å seie for Noreg som nasjon i dag. Han siterte professor Jørn Øyrehagen Sunde der han seier at opplesinga av Kristenretten på Moster endra Noreg for all tid.»

Jubileet er ikkje først og fremst eit kyrkjejubileum, men eit allment riksjubileum med søkjelys på verdiar i lovverk og samfunn. Det vert framheva kva som skjedde med Kristenretten, og kva det innebar at det vart innført nye verdisett og måtar å tenkje og handle på. Det er planlagt ei rekkje verdisamtalar i jubileumsveka der det vert samtalar kring tema som fridom, rettsvern og likeverd – kva det betyr i dag og korleis dei skal prege oss framover. Dette er også grunnen til at overskrifta for jubileet er Feire fortid – forme framtid.

Det er 1000 år sidan Olav Haraldson – seinare Olav den heilage – innsette Kristenretten på Moster i 1024. Kristenretten innebar eit brot med den gamle tida der urett vart oppgjort gjennom hemn mellom ættene. Den nye retten innebar m.a. eit nytt menneskesyn der utsetjing av born vart forbode.

Det er ei mengde arrangement som skal skje på Moster frå 29. mai – 2. juni. Det er konsertar, førestillingar med mykje meir. Høgdepunktet vert ei økumenisk gudsteneste 2. juni i Moster amfi med overføring til kyrkjeteltet utanfor amfiet. Sjå https://moster2024.no/jubileumsveka for nærare informasjon.

Vi ser fram til ei stor og viktig jubileumsfeiring på Moster. Samtidig er vi opptekne av at vårt fokus: Feire fortid – forme framtid vert løfta fram lokalt slik at det stimulerer til gode verdisamtalar» sa Svein Arne Theodorsen.

KM-Karane